राम मंदिरातील कथित 400 कोटींच्या गैरव्यवहारावर राज ठाकरेंचा सवाल; 'प्रश्न विचारला म्हणजे धर्माचा अपमान कसा?

मुंबई (प्रतिनिधी) : राम मंदिरातील कथित आर्थिक गैरव्यवहाराच्या मुद्द्यावर मनसे अध्यक्ष राज ठाकरे यांनी सरकार आणि मंदिर प्रशासनावर जोरदार प्रश्न उपस्थित केले आहेत. "राम मंदिरातील कथित चोरीबद्दल बोललो, तर तो धर्माचा अपमान कसा होतो? चोरीचा आणि धर्माचा काय संबंध?" असा सवाल त्यांनी केला.

राज ठाकरे म्हणाले की, राम मंदिराबद्दल प्रत्येक हिंदूप्रमाणेच आम्हालाही आस्था आहे. भाविकांनी श्रद्धेने दानपेटीत आणि मंदिरासाठी दिलेल्या निधीमध्ये जर गैरव्यवहार झाल्याचे आरोप होत असतील, तर त्याबाबत प्रश्न विचारणे चुकीचे नाही. लोकांच्या श्रद्धेतून जमा झालेल्या सुमारे 400 कोटी रुपयांच्या कथित गैरव्यवहाराचा मुद्दा गंभीर असल्याचे त्यांनी म्हटले.

ट्रस्टच्या रचनेवरही त्यांनी भाष्य केले. त्यांच्या म्हणण्यानुसार, 15 ट्रस्टींपैकी 12 जणांची नियुक्ती केंद्र सरकारकडून करण्यात आली असून, त्यांचा संबंध RSS, विश्व हिंदू परिषद किंवा भाजपशी असल्याचा दावा त्यांनी केला. तसेच केंद्र आणि राज्य सरकारचे वरिष्ठ IAS अधिकारीही प्रशासनात असतानाही असे आरोप समोर येत असल्याने याची सखोल चौकशी व्हावी, अशी मागणी त्यांनी केली.

राज ठाकरे यांनी पुढे दावा केला की, राम मंदिरातील कथित गैरव्यवहाराचा मुद्दा सर्वप्रथम भाजपच्याच एका खासदाराने उपस्थित केला होता. त्यानंतरच त्यांनी या विषयावर भूमिका मांडल्याचे त्यांनी सांगितले. "जर दुसऱ्या पक्षाचे सरकार असते, तर भाजप, RSS आणि विश्व हिंदू परिषद यांनी याच मुद्द्यावर मोठे आंदोलन केले असते. मग आता प्रश्न विचारले की त्याला राजकारण का म्हणायचे?" असा सवालही त्यांनी उपस्थित केला.

तसेच, "राम मंदिरातील कथित गैरव्यवहाराबाबत उत्तर मागणे म्हणजे धर्मविरोधी भूमिका नाही. श्रद्धेने दिलेल्या निधीचा योग्य वापर झाला का, याचा जाब मागणे हा प्रत्येक नागरिकाचा अधिकार आहे," असेही राज ठाकरे यांनी स्पष्ट केले.