"विद्यार्थ्यांवर दडपशाही नको, त्यांच्या मागण्यांचा संवेदनशीलतेने विचार करा"; जंतर-मंतरवर पोहोचून शरद पवारांची मागणी

नवी दिल्ली: दिल्लीतील जंतर-मंतरवर आंदोलन करणाऱ्या विद्यार्थ्यांवर झालेल्या पोलीस लाठीमारानंतर राजकीय घडामोडींना वेग आला आहे. राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांनी जंतर-मंतरवर जाऊन आंदोलक विद्यार्थ्यांची भेट घेतली आणि जखमींची विचारपूस केली. "शांततेच्या मार्गाने लढणाऱ्या विद्यार्थ्यांवर दडपशाही करण्याऐवजी सरकारने त्यांच्या मागण्यांचा संवेदनशीलतेने विचार करावा," अशी आक्रमक मागणी त्यांनी या वेळी केली.

'लोकशाही मूल्यांना न शोभणारी वागणूक'

भेट्टीनंतर सोशल मीडिया प्लॅटफॉर्म 'X' वर पोस्ट करत शरद पवार म्हणाले, "NEET परीक्षेतील घोळ आणि पेपरफुटीविरोधात विद्यार्थी उपोषण करत आहेत. न्याय्य मागण्यांसाठी लढा देणाऱ्या तरुणांना पोलिसांनी दिलेली वागणूक लोकशाही मूल्यांना धरून नाही. देशातील प्रत्येक नागरिकाच्या अधिकारांचे रक्षण संविधानाने केले असून सरकार जनतेला उत्तरदायी आहे."

विद्यार्थ्यांच्या चार प्रमुख मागण्या:

आंदोलनाचे नेतृत्व करणाऱ्या अभिजीत दीपके यांनी शरद पवार यांच्याकडे आपल्या मागण्या मांडल्या. यामध्ये प्रामुख्याने:

1. आंदोलनकर्त्या विद्यार्थ्यांवरील दिल्ली व मुंबईतील गुन्हे मागे घेण्यात यावेत.

2. केंद्रीय शिक्षणमंत्री धर्मेंद्र प्रधान यांनी राजीनामा द्यावा.

3. आत्महत्या केलेल्या पीडित विद्यार्थ्यांच्या कुटुंबांना प्रत्येकी १ कोटी रुपयांची मदत मिळावी.

4. रुग्णालयात उपचार घेत असलेले ज्येष्ठ समाजसेवक सोनम वांगचुक यांची मुक्तता करण्यात यावी.