Pahalgam Terror Attack: पहलगाममध्ये झालेल्या हल्ल्याचे परिणाम कोल्हापूरमध्ये, सुमारे 'इतक्या' कोटींची उलाढाल ठप्प

कोल्हापूर : भारताचे स्वित्झर्लंड अशी ओळख असलेल्या  काश्मीरमधल्या पहलगाममध्ये दहशतवाद्यांनी भ्याड हल्ला केला. या हल्ल्यात 26 जणांचा मृत्यू झाला. त्यात महाराष्ट्रातील 6 पर्यटकांचा समावेश होता. या हल्ल्याचे पडसाद देशभरात उमटताना दिसत आहेत.  

पहलगाममध्ये झालेल्या या हल्ल्यानंतर पर्यटकांनी काश्मीरकडं पाठ फिरवल्याचं दिसत आहे. त्यामुळं काश्मीरमधली पर्यटनावर चालणारी आर्थिक उलाढाल कमी होण्याची शक्यता आहे.

या हल्ल्यानंतर कोल्हापुरातून काश्मीरला जाणाऱ्या पर्यटकांनी मे महिन्यातील बुकिंग रद्द केलय. त्यामुळं लाखो रुपयांची उलाढाल ठप्प होणार आहे. "वर्षभर पर्यटनावर या हल्ल्याचा दूरगामी परिणाम सोसावा लागणार आहे," असं मत देश-विदेशात सहलीचं आयोजन करणारे महेश गोवेकर यांनी 'ईटीव्ही भारत'शी बोलताना व्यक्त केलं.

पहलगाममध्ये दहशतवाद्यांनी हल्ला केल्यानंतर आता  पर्यटकांमध्ये भीतीचं वातावरण पसरलं आहे. याचा परिणाम कोल्हापूरतही झाल्याच पाहायला मिळत आहे. कोल्हापुरातून दरवर्षी 6 हजार पर्यटक काश्मीरला जात असतात. पण आता या हल्ल्यामुळे 80 टक्के पर्यटकांनी बुकिंग रद्द केले आहे. यामुळे सुमारे 36 कोटींची उलाढाल ठप्प झाली आहे. 

काश्मीरकडे फिरवली पाठ 

कोल्हापुरात विविध टूर्स अँड ट्रॅव्हल्स कंपन्यांच्या माध्यमातून देश-विदेशात सहलींचं आयोजन केलं जातं. कोल्हापुरातून अनेक खासगी टूर्स अँड ट्रॅव्हल्स कंपन्या खास काश्मीरसाठी सहली आयोजित करतात. काही दिवसांत शालेय सुट्ट्या सुरू होणार आहेत. त्यामुळं कोल्हापुरातील वेगवेगळ्या खासगी कंपन्यांच्या माध्यमातून काश्मीरला जाण्यासाठी बुकिंग केलं होतं. मात्र, या हल्ल्यानंतर सुमारे 80 टक्के पर्यटकांनी काश्मीरचा दौरा रद्द केलाय. तर, अनेकांनी उत्तराखंड, अरुणाचल प्रदेश आणि हिमाचल प्रदेश सारख्या थंड हवेच्या ठिकाणांना प्राधान्य दिलय. 

कोल्हापूर जिल्ह्यातील 200 पर्यटक काश्मीरमध्ये अडकले आहेत. हे सर्व पर्यटक काश्मीरमध्ये सुखरूप आहेत. केंद्र सरकारनं लवकरात लवकर याबाबत भूमिका घेऊन ठप्प झालेला पर्यटन व्यवसाय सुरळीत होण्यासाठी कायमस्वरूपी उपाय योजना कराव्यात, अशी मागणी महेश गोवेकर यांनी ईटीव्ही भारतशी बोलताना केली.