'भाजपला फंडिंग कुठून मिळतंय?'; कॉक्रोच जनता पार्टीचा सवाल, पीएम केअर्सच्या ऑडिटची मागणी!

छत्रपती संभाजीनगर: राजधानी दिल्लीतील जंतर-मंतरवर यशस्वी आंदोलन केल्यानंतर आता कॉक्रोच जनता पार्टीने (CJP) सत्ताधारी भारतीय जनता पक्षावर (BJP) थेट हल्लाबोल केला आहे. "भाजपच्या निधीचा नेमका स्रोत काय आहे, हे त्यांनी स्पष्ट करावे," अशी मागणी करत CJP चे मुख्य प्रवक्ते सौरभ दास यांनी पीएम केअर्स फंड आणि पंतप्रधान राष्ट्रीय मदत निधीचे तातडीने ऑडिट करण्याची मागणी केली आहे. छत्रपती संभाजीनगरमध्ये आयोजित पक्षाच्या कोअर कमिटीच्या बैठकीदरम्यान ते माध्यमांशी बोलत होते.

'तुम्ही आमचा हिशोब मागता, मग तुमची कागदपत्रे दाखवा!'

केंद्र सरकारवर निशाणा साधताना सौरभ दास म्हणाले की, विरोधक आणि आंदोलकांकडून घराच्या भाड्यापासून प्रत्येक लहान-मोठ्या गोष्टींचा हिशोब व कागदपत्रे मागितली जातात. मग भाजपच्या स्वतःच्या निधी आणि आर्थिक व्यवहारांमध्ये पारदर्शकता का नाही?

दास पुढे म्हणाले,

"आम्ही आमचा सर्व हिशोब देण्यास तयार आहोत, पण त्याआधी पंतप्रधान मोदींनी आपली पदवी दाखवावी आणि पीएम केअर्स व PMNRF चे ऑडिट करून भाजपला मिळणारा निधी सार्वजनिक करावा. येत्या ६ ऑगस्ट रोजी आम्ही आमच्या आंदोलनाचा पुढील रोडमॅप जाहीर करणार आहोत."

यासोबतच, २० जुलै रोजी आयोजित करण्यात आलेल्या 'चलो संसद' मोर्चादरम्यान कार्यकर्त्यांवर झालेल्या कथित पोलीस कारवाईबाबत केंद्रीय गृहमंत्री अमित शाह यांनी संसदेत स्पष्टीकरण द्यावे, अशी मागणीही त्यांनी केली.

CJP राजकीय पक्ष बनणार का? संस्थापक अभिजित दीपके यांचे स्पष्टीकरण

CJP चे संस्थापक अभिजित दीपके यांनी संघटनेच्या पुढील वाटचालीबाबत भूमिका स्पष्ट केली आहे. 'एएनआय'शी (ANI) बोलताना दीपके म्हणाले की, जंतर-मंतरवरील आंदोलनाचा आढावा घेणे आणि देशभरात संघटन वाढवणे हा या बैठकीचा मुख्य उद्देश आहे.

संघटनेचे राजकीय पक्षात रूपांतर करण्याबाबत बोलताना ते म्हणाले:

"सध्या CJP ला राजकीय पक्ष बनवण्याचा कोणताही विचार किंवा प्रस्ताव नाही. ही संघटना एक सामाजिक चळवळ म्हणूनच काम करत राहील, यावर सर्व सदस्यांचे एकमत झाले आहे."