डी. वाय. दादा अजातशत्रू आणि अफाट कर्तृत्ववान व्यक्तिमत्त्व ; जयंत पाटलांनी व्यक्त केल्या भावना

कोल्हापूर/प्रतिनिधी :  माजी राज्यपाल आणि ज्येष्ठ नेते डॉ. डी. वाय. पाटील (डी. वाय. दादा) यांच्या आठवणींना उजाळा देत राष्ट्रवादी काँग्रेसचे (शरद पवार गट) नेते जयंत पाटील यांनी आपल्या भावना व्यक्त केल्या. पत्रकारांशी बोलताना जयंत पाटील म्हणाले की, "डी. वाय. दादा हे अत्यंत अजातशत्रू, मोठ्या मनाचे आणि अफाट कर्तृत्व असलेले व्यक्तिमत्त्व होते. त्यांच्याकडे दादांच्या अनेक जुन्या आणि गोड आठवणी आहेत."

जयंत पाटील यांनी सांगितले की, ७० च्या दशकात जेव्हा मर्सिडीज गाड्या दुर्मिळ असायच्या, तेव्हा एक तरुण आणि उत्साही शेतकरी-नेते म्हणून डी. वाय. दादांनी मर्सिडीज गाडी घेतली होती आणि सर्वांना प्रेमाने त्यात फिरवले होते. ग्रामीण भागातून आलेल्या या नेत्याने स्वकर्तृत्वावर देशात व परदेशात शिक्षण संस्थांचे जाळे उभे केले. आज त्यांच्या शैक्षणिक संस्थांमध्ये हजारो विद्यार्थी शिक्षण घेत आहेत.

ते पुढे म्हणाले की, दादांनी सर्व सहकाऱ्यांना नेहमीच प्रेमाने आणि आपुलकीने वागवले. त्यांच्या पश्चात त्यांचे चिरंजीव सतेज (बंटी) पाटील, संजय पाटील, विजय पाटील आणि कुटुंबातील अन्य सदस्यांनी मुंबई, पुणे व कोल्हापूर येथील संस्थांचे काम अत्यंत सक्षमपणे सांभाळले आहे. सतेज पाटील आणि इतर कुटुंबीय दादांचा वसा पुढे नेण्याचे उत्तम काम करत असून, त्यांचे राजकीय आणि सामाजिक भविष्य उज्ज्वल आहे, असा विश्वासही जयंत पाटील यांनी व्यक्त केला.