‘नायकांचा खून कोणी केला?’ राणेंविरोधात संजय राऊतांचा हल्लाबोल

मुंबई प्रतिनिधी - दिशा सालियान मृत्यू प्रकरणातील नव्या घडामोडींनंतर महाराष्ट्रातील राजकीय वातावरण पुन्हा तापले आहे. या पार्श्वभूमीवर खासदार संजय राऊत यांनी पत्रकार परिषद घेत मंत्री राणे यांच्यावर गंभीर आरोप केले. यावेळी त्यांनी कोकणातील काही जुन्या हत्या प्रकरणांचा उल्लेख करत विविध प्रश्न उपस्थित केले.

दिशा सालियान मृत्यू प्रकरणातील तपासासंदर्भात समोर आलेल्या माहितीनंतर राजकीय आरोप-प्रत्यारोपांना वेग आला आहे. सीबीआयच्या एफआयआरमध्ये उद्धव ठाकरे, आदित्य ठाकरे यांच्यासह काही नावांचा उल्लेख असल्याची चर्चा सुरू झाल्यानंतर ठाकरे गटाकडूनही प्रतिक्रिया देण्यात येत आहेत.

'ठाकरे यांच्या बदनामीमागे कोण?'

संजय राऊत यांनी आरोप केला की, आदित्य ठाकरे ज्या व्यक्तीला कधी भेटलेही नाहीत, त्या प्रकरणात त्यांच्यावर आरोप केले जात आहेत. यामागे कोण आहे आणि आर्थिक मदत कुठून होत आहे, याची माहिती असल्याचा दावा त्यांनी केला.

तसेच ठाकरे कुटुंबाच्या बदनामीसाठी नेपाळी गँगकडून फंडिंग होत असल्याचा आरोपही राऊत यांनी केला. यावेळी त्यांनी काही व्यक्तींच्या भूमिकेवरही प्रश्न उपस्थित करत भविष्यात त्यांची 'कुंडली' समोर येईल, असे म्हटले.

जुन्या हत्या प्रकरणांचा उल्लेख करत सवाल

पत्रकार परिषदेत राऊत यांनी कणकवली परिसरातील मागील काही वर्षांतील हत्या प्रकरणांचा उल्लेख केला. गोवेकर, अंकुश राणे, सत्यविजय भिसे आणि नायक यांच्या मृत्यूच्या घटनांचा संदर्भ देत त्यांनी या प्रकरणांचा निष्पक्ष तपास झाला का, असा सवाल उपस्थित केला.

अंकुश राणे यांचा खरा मारेकरी कोण? सत्यविजय भिसे यांना कोणी मारले? नायकांच्या हत्येमागे कोण होते? गोवेकर यांना कुठे नेण्यात आले? असे प्रश्न राऊत यांनी उपस्थित केले.

या प्रकरणांमध्ये सखोल आणि निष्पक्ष तपास झाला असता तर आज काही लोकांना अशा पद्धतीने बोलण्याची वेळ आली नसती, असा दावाही राऊत यांनी केला.

तपास यंत्रणा ताब्यात घेतल्या

राऊत यांनी पुढे आरोप केला की, संबंधित जुनी प्रकरणे दडपण्यात आली असून सीबीआय, महाराष्ट्र पोलीस आणि इतर तपास यंत्रणांवर दबाव असल्याचा त्यांनी दावा केला. ही प्रकरणे पुन्हा उकरून काढायची ठरवली तर अनेक बाबी समोर आणता येतील, असेही ते म्हणाले.

मात्र, पुराव्याशिवाय कोणावरही आरोप करू नयेत, असेही राऊत यांनी स्पष्ट केले. न्यायालयीन प्रक्रियेत सध्या कोणाला आरोपी ठरवण्यात आलेले नसताना एखाद्याला लक्ष्य करणे योग्य आहे का, असा सवाल करत त्यांनी सध्याच्या राजकीय वादावर टीका केली.