सांगली-सातारा विधान परिषद निवडणुकीत तिरंगी लढत; शिवसेनेच्या उमेदवाराची माघार, भाजप-राष्ट्रवादीत थेट मुकाबला

सातारा (प्रतिनिधी) : सांगली-सातारा स्थानिक प्राधिकरण मतदारसंघाच्या विधान परिषद निवडणुकीत आता तिरंगी सामना रंगणार आहे. उमेदवारी अर्ज मागे घेण्याची मुदत संपल्यानंतर भाजपचे धैर्यशील कदम, राष्ट्रवादी काँग्रेस (शरद पवार गट) चे अभयसिंह जगताप आणि अपक्ष उमेदवार किशोर धुमाळ यांचे अर्ज कायम राहिले आहेत.

दरम्यान, शिवसेनेशी संबंधित अपक्ष उमेदवार तानाजी पाटील यांनी आपला उमेदवारी अर्ज मागे घेतला आहे. त्यानंतर काँग्रेसचे उमेदवार संजय मेंढे आणि मयूर पाटील यांनीही निवडणुकीतून माघार घेतली. अपक्ष उमेदवार बाळासाहेब पाटील यांनीदेखील अर्ज मागे घेतल्याने निवडणुकीचे चित्र स्पष्ट झाले आहे.

यामुळे महायुतीचे उमेदवार धैर्यशील कदम यांच्यासमोर महाविकास आघाडी समर्थित अभयसिंह जगताप आणि अपक्ष किशोर धुमाळ यांचे आव्हान असणार आहे. त्यामुळे या मतदारसंघात चुरशीची तिरंगी लढत होण्याची शक्यता व्यक्त केली जात आहे.

तानाजी पाटील यांच्या माघारीबाबत मंत्री शंभूराजे देसाई यांनी प्रतिक्रिया देताना सांगितले की, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्याशी चर्चा करून महायुतीचा धर्म जपण्यासाठी हा निर्णय घेण्यात आला. तसेच तानाजी पाटील यांचा भविष्यात योग्य सन्मान केला जाईल, असे आश्वासनही देण्यात आल्याचे त्यांनी म्हटले.

यावेळी तानाजी पाटील यांनीही आपल्या उमेदवारीमुळे महायुतीत कोणताही तणाव निर्माण होऊ नये, यासाठी पक्षाच्या वरिष्ठ नेतृत्वाच्या सूचनेनुसार अर्ज मागे घेतल्याचे स्पष्ट केले.