कोल्हापुरात 'राज्यपाल क्रीडा महोत्सव' आयोजित करा; भाजयुमो प्रदेशाध्यक्ष कृष्णराज महाडिक यांची राज्यपालांकडे पत्राद्वारे मागणी

कोल्हापूर/प्रतिनिधी : कोल्हापूरची जागतिक दर्जाची क्रीडा परंपरा विचारात घेता, कोल्हापुरात 'राज्यपाल क्रीडा महोत्सव' आयोजित करण्यात यावा, तसेच जिल्ह्यातील क्रीडा पायाभूत सुविधांच्या सर्वांगीण विकासासाठी राज्य शासनाला आवश्यक मार्गदर्शन करावे, अशी मागणी भारतीय जनता युवा मोर्चाचे (भाजयुमो) प्रदेशाध्यक्ष कृष्णराज महाडिक यांनी महाराष्ट्राचे राज्यपाल जिष्णूदेव वर्मा यांच्याकडे पत्राद्वारे केली आहे.

क्रीडानगरीतील प्रतिभेला मिळणार भक्कम व्यासपीठ

राज्यपालांना पाठवलेल्या निवेदनात कृष्णराज महाडिक यांनी म्हटले आहे की, "कोल्हापूर ही केवळ ऐतिहासिक आणि सांस्कृतिक भूमी नसून ती महाराष्ट्राची अग्रगण्य क्रीडानगरी आहे. कुस्ती, नेमबाजी, जलतरण, अ‍ॅथलेटिक्स, फुटबॉल, हॉकी, कबड्डी आणि क्रिकेट यांसारख्या अनेक क्रीडा प्रकारांत कोल्हापूरच्या खेळाडूंनी राष्ट्रीय व आंतरराष्ट्रीय स्तरावर देशाचे नाव उज्ज्वल केले आहे. अशा या क्रीडानगरीत 'राज्यपाल क्रीडा महोत्सव' झाल्यास राज्यभरातील युवा खेळाडूंना मोठी प्रेरणा मिळेल आणि ग्रामीण व शहरी भागातील खेळाडूंना स्वतःचे कौशल्य सिद्ध करण्यासाठी एक भक्कम व्यासपीठ उपलब्ध होईल."

क्रीडा पायाभूत सुविधांचा विकास का गरजेचा?

कोल्हापूरला देशातील आदर्श क्रीडा केंद्र (Sports Hub) बनवण्यासाठी खालील अद्ययावत सुविधांची गरज महाडिक यांनी व्यक्त केली आहे:

·         आधुनिक बहुउद्देशीय क्रीडा संकुले आणि आंतरराष्ट्रीय दर्जाची प्रशिक्षण केंद्रे.

·         अत्याधुनिक मैदाने आणि निवासी क्रीडा अकादमी.

·         वैज्ञानिक प्रशिक्षण सुविधा आणि ग्रामीण भागातील क्रीडा पायाभूत सुविधांचा विस्तार.

"युवकांच्या भविष्यातील ही उत्तम गुंतवणूक!"

क्रीडा क्षेत्रातील गुंतवणुकीचे महत्त्व अधोरेखित करताना महाडिक म्हणाले, "क्रीडा क्षेत्रातील गुंतवणूक ही केवळ पायाभूत सुविधांची उभारणी नसून ती आपल्या युवकांच्या आरोग्यदायी, शिस्तबद्ध आणि राष्ट्राभिमानी भविष्यातील गुंतवणूक आहे. महामहीम राज्यपालांच्या प्रेरणादायी नेतृत्वाखाली हा उपक्रम राज्यातील युवा पिढीला नवी दिशा देईल."

त्यामुळे राज्यपाल जिष्णूदेव वर्मा यांनी या विनंतीचा सकारात्मक विचार करून कोल्हापूरला 'राज्यपाल क्रीडा महोत्सवा'चे यजमानपद बहाल करावे, तसेच कोल्हापूरच्या क्रीडा विकासासाठी आवश्यक ती पावले उचलण्यास राज्य शासनाला प्रोत्साहित करावे, अशी आग्रही विनंती कृष्णराज महाडिक यांनी केली आहे.