जामीन मिळाला, पण स्टेटस पडले महागात! पोर्शे प्रकरणात नवा ट्विस्ट

पुणे (प्रतिनिधी) : पुणे शहराला हादरवून सोडणाऱ्या आणि देशभरात चर्चेचा विषय ठरलेल्या पोर्शे अपघात प्रकरणात एक मोठी घडामोड समोर आली आहे. या प्रकरणातील मुख्य अल्पवयीन आरोपीचे वडील आणि प्रसिद्ध बांधकाम व्यावसायिक विशाल अग्रवाल यांच्या अडचणी पुन्हा वाढण्याची शक्यता निर्माण झाली आहे. सर्वोच्च न्यायालयाकडून जामीन मंजूर झाल्यानंतर सोशल मीडियावर व्हायरल झालेल्या एका व्हिडिओमुळे पुणे पोलिसांनी आता त्यांचा जामीन रद्द करण्याची तयारी सुरू केली आहे.

मिळालेल्या माहितीनुसार, सर्वोच्च न्यायालयाने जामीन मंजूर करताना काही कठोर अटी घातल्या होत्या. अपघातात मृत्युमुखी पडलेल्या दोन तरुणांच्या कुटुंबीयांना कोणत्याही प्रकारे मानसिक किंवा शारीरिक त्रास होणार नाही, याची काळजी घेण्याचे स्पष्ट निर्देश न्यायालयाने दिले होते. मात्र, जामीन मिळाल्यानंतर विशाल अग्रवाल यांच्या नावाने व्हॉट्सॲप स्टेटसवर एक व्हिडिओ शेअर झाल्याचा दावा करण्यात आला. या व्हिडिओमध्ये आनंदोत्सवासारखे वातावरण दिसत असल्याचे सांगितले जात आहे.

पुणे पोलिसांनी या प्रकरणाची चौकशी सुरू केली असून, संबंधित स्टेटस पाहिल्याचा दावा करणाऱ्या काही व्यक्तींचे जबाबही नोंदवले आहेत. पोलिसांच्या मते, हा व्हिडिओ जुना असला तरी जामीन मिळाल्यानंतर तो स्टेटसवर ठेवणे हे न्यायालयाने घालून दिलेल्या अटींचे उल्लंघन ठरू शकते. यामुळे मृत तरुणांच्या कुटुंबीयांच्या भावना दुखावल्या गेल्या असून त्यांना मानसिक त्रास सहन करावा लागल्याचा मुद्दा पोलिस न्यायालयात मांडणार आहेत.

दरम्यान, विशाल अग्रवाल यांच्या वतीने सर्व आरोप फेटाळण्यात आले आहेत. संबंधित व्हिडिओ हा अपघाताच्या आधीचा जुना व्हिडिओ असल्याचा दावा त्यांच्या वकिलांनी केला आहे. तसेच जामीन मिळाल्यानंतर कोणत्याही प्रकारचा उत्सव साजरा करण्यात आलेला नाही, असेही त्यांनी स्पष्ट केले आहे.

मात्र, पोलिस या भूमिकेशी सहमत नसून व्हिडिओ नेमका केव्हा चित्रित करण्यात आला यापेक्षा तो जामीनानंतर सार्वजनिकरित्या प्रसारित करण्यात आला, हा मुद्दा अधिक महत्त्वाचा असल्याचे सांगत आहेत. त्यामुळे आता २३ जून रोजी न्यायालयात दाखल होणाऱ्या याचिकेकडे सर्वांचे लक्ष लागले आहे.

विशाल अग्रवाल यांचा जामीन कायम राहणार की न्यायालय पोलिसांच्या मागणीला मान्यता देणार, याचा निर्णय येत्या काही दिवसांत स्पष्ट होणार आहे. त्यामुळे पोर्शे अपघात प्रकरण पुन्हा एकदा चर्चेच्या केंद्रस्थानी आले आहे.