शरद पवारांच्या शिंदे दालनातील बैठकीवर संजय राऊतांची तीव्र नाराजी; "विश्वासार्हतेवर परिणाम होतो"

मुंबई (प्रतिनिधी) : राष्ट्रवादी काँग्रेसचे संस्थापक शरद पवार यांनी विधानभवनात उपमुख्यमंत्री एकनाथ शिंदे यांच्या दालनात पक्षाची बैठक घेतल्याने राजकीय चर्चांना उधाण आले आहे. या पार्श्वभूमीवर ठाकरे गटाचे खासदार संजय राऊत यांनी या निर्णयावर तीव्र नाराजी व्यक्त केली आहे.

पत्रकार परिषदेत बोलताना राऊत म्हणाले की, ज्या व्यक्तीने महाविकास आघाडीचे सरकार पाडले, त्यांच्या दालनात जाऊन बैठक घेणे योग्य संदेश देत नाही. अशा कृतीमुळे मोठ्या नेत्यांच्या आणि पक्षाच्या विश्वासार्हतेवर परिणाम होऊ शकतो, असे त्यांनी म्हटले.राऊत यांनी पुढे सांगितले की, विधानभवन परिसरात बैठकीसाठी इतर पर्याय उपलब्ध असताना शिंदे यांच्या दालनाची निवड करण्याची गरज नव्हती. या कृतीमुळे शिवसेना कार्यकर्त्यांमध्ये अस्वस्थता निर्माण झाल्याचेही त्यांनी स्पष्ट केले.

मात्र, शरद पवार यांच्या विचारधारेबद्दल कोणतीही शंका नसल्याचे सांगत राऊत यांनी ते एनडीएसोबत जाणार नाहीत, असा विश्वासही व्यक्त केला. तरीही शिंदे यांच्या दालनात झालेल्या बैठकीमुळे चुकीचा राजकीय संदेश गेला असून, गद्दारीविरोधात घेतलेल्या भूमिकेशी विसंगती निर्माण झाल्याची टीकाही त्यांनी केली.

याचवेळी महाराष्ट्र-कर्नाटक सीमाप्रश्नावरही राऊत यांनी सरकारला लक्ष्य केले. सीमावादाच्या मुद्द्यावर सरकारची भूमिका, सर्वोच्च न्यायालयातील पाठपुरावा आणि सीमाभागातील मराठी नागरिकांच्या प्रश्नांबाबत त्यांनी अनेक प्रश्न उपस्थित केले.शरद पवार यांच्या या बैठकीवरून आता महाविकास आघाडीतील राजकीय वातावरण तापले असून, आगामी काळात या वादावर आणखी प्रतिक्रिया उमटण्याची शक्यता व्यक्त केली जात आहे.