पुणे वेधशाळेचा इशारा! एल निनोचा मान्सूनवर परिणाम; महाराष्ट्रात कमी पावसाची शक्यता, शेतकऱ्यांना सावधगिरीचा सल्ला

पुणे (प्रतिनिधी) : यंदाच्या मान्सूनवर एल निनोचा प्रभाव स्पष्टपणे दिसून येत असून महाराष्ट्रासह देशात सरासरीपेक्षा कमी पाऊस पडण्याची शक्यता हवामान विभागाने व्यक्त केली आहे. पुणे वेधशाळेचे हवामान शास्त्रज्ञ एस. डी. सानप यांनी दिलेल्या माहितीनुसार, यंदा मान्सून हंगामात सरासरीच्या सुमारे ९० टक्के इतकाच पाऊस होण्याचा अंदाज आहे.

सानप यांनी सांगितले की, मान्सूनच्या पुढील वाटचालीसाठी आवश्यक वातावरणीय परिस्थिती सध्या अनुकूल नसल्याने त्याचा वेग मंदावला आहे. त्यामुळे मान्सूनला महाराष्ट्रात सर्वत्र पोहोचण्यासाठी आणखी काही दिवस लागू शकतात. राज्यात पुढील काही दिवस व्यापक स्वरूपाच्या पावसाची शक्यता कमी असल्याचेही त्यांनी स्पष्ट केले.दरम्यान, काही भागांत झालेल्या पूर्वमोसमी पावसामुळे शेतकऱ्यांनी घाईघाईने पेरणी करू नये, असा महत्त्वाचा सल्ला हवामान तज्ज्ञांनी दिला आहे. पावसामध्ये खंड पडण्याची शक्यता लक्षात घेता हवामानाचा अंदाज पाहूनच पेरणीचे निर्णय घेणे आवश्यक असल्याचे त्यांनी नमूद केले.

एल निनोच्या प्रभावामुळे यंदा महाराष्ट्रात सरासरीपेक्षा कमी पाऊस राहण्याची शक्यता असून त्याचा परिणाम शेती, जलसाठे आणि पाणीपुरवठ्यावर होऊ शकतो. त्यामुळे शेतकरी तसेच संबंधित यंत्रणांनी परिस्थितीचा आढावा घेत योग्य नियोजन करण्याची गरज व्यक्त केली जात आहे.हवामान तज्ज्ञांच्या मते, एल निनो आणि दुष्काळ यांचा थेट संबंध असल्याचे निश्चितपणे सांगता येत नसले तरी भूतकाळातील अनेक दुष्काळी वर्षांमध्ये त्याचा प्रभाव जाणवला आहे. त्यामुळे यंदाच्या मान्सूनबाबत व्यक्त करण्यात आलेल्या अंदाजाकडे गांभीर्याने पाहिले जात आहे.

जर पावसाचे प्रमाण अपेक्षेपेक्षा कमी राहिले, तर पावसावर अवलंबून असलेल्या भागांमध्ये पाणीटंचाईचे संकट निर्माण होऊ शकते. याचा परिणाम धरणांतील जलसाठा, जनावरांच्या चाऱ्याची उपलब्धता आणि नागरिकांच्या पिण्याच्या पाण्यावरही होण्याची शक्यता आहे. त्यामुळे आगामी काही दिवस राज्याच्या कृषी आणि जलव्यवस्थापनाच्या दृष्टीने अत्यंत महत्त्वाचे ठरणार आहेत.