जंतरमंतरवरील विद्यार्थ्यांच्या आंदोलनाचे पडसाद संसदेत; एनडीए-विरोधक आमनेसामने, प्रियांका गांधींची घोषणाबाजी

मुंबई (प्रतिनिधी) : जंतरमंतरवर विद्यार्थ्यांचे आंदोलन सुरू असतानाच त्याचे पडसाद आता थेट संसदेत उमटले आहेत. संसदेच्या पावसाळी अधिवेशनाच्या चौथ्या दिवशी संसद भवन परिसरात एनडीए आणि इंडिया आघाडीचे खासदार आमनेसामने आले. दोन्ही बाजूंनी जोरदार घोषणाबाजी झाली. काँग्रेस अध्यक्ष मल्लिकार्जुन खरगे, राहुल गांधी, प्रियांका गांधी आणि अखिलेश यादव यांच्यासह विरोधी पक्षाच्या खासदारांनी सरकारविरोधात निदर्शने केली, तर एनडीएच्या खासदारांनीही प्रतिआंदोलन करत विरोधकांवर निशाणा साधला.

आंदोलनादरम्यान प्रियांका गांधी या घोषणाबाजी करत एनडीएच्या खासदारांच्या दिशेने गेल्या. मात्र, सुरक्षा कर्मचाऱ्यांनी हस्तक्षेप करून त्यांना पुढे जाण्यापासून रोखले. संसदेच्या आतही गदारोळ कायम राहिल्याने लोकसभा आणि राज्यसभेचे कामकाज वारंवार तहकूब करण्यात आले.

दरम्यान, नीट पेपरफुटी प्रकरणावरून विरोधकांनी शिक्षणमंत्री धर्मेंद्र प्रधान यांच्या राजीनाम्याची मागणी अधिक आक्रमकपणे लावून धरली आहे. प्रियांका गांधी म्हणाल्या, विद्यार्थ्यांच्या मागण्या ऐकण्याऐवजी सरकार वेगळ्याच विषयांवर बोलत आहे. विद्यार्थ्यांचा व्यवस्थेवरील विश्वास डळमळीत झाला असून, धर्मेंद्र प्रधान यांनी राजीनामा द्यावा आणि आंदोलनादरम्यान विद्यार्थ्यांवर झालेल्या कारवाईची चौकशी व्हावी, अशी त्यांची मागणी आहे.

पेपरफुटी प्रकरणांवर जलदगती न्यायालये स्थापन करण्याच्या पंतप्रधान नरेंद्र मोदी यांच्या घोषणेवरही विरोधकांनी टीका केली. काँग्रेसचे के. सी. वेणुगोपाल म्हणाले की, केवळ घोषणा करून उपयोग नाही; आधी शिक्षणमंत्र्यांना पदावरून हटवावे आणि विद्यार्थ्यांशी संवाद साधावा.

तर काँग्रेस अध्यक्ष मल्लिकार्जुन खरगे यांनी स्पष्ट शब्दांत सांगितले की, शिक्षणमंत्री धर्मेंद्र प्रधान यांनी राजीनामा दिल्यानंतरच या विषयावर चर्चेसाठी विरोधक तयार होतील. त्यामुळे नीट पेपरफुटीचा मुद्दा आता रस्त्यापासून संसदेपर्यंत चांगलाच तापल्याचे चित्र पाहायला मिळत आहे.