सध्याची स्थिती अशीच राहिल्यास भारत २०४७ पर्यंत विकसित होणार नाही; पर्यावरणवादी सोनम वांगचुक यांचा खळबळजनक दावा

नवी दिल्ली : देशाच्या भवितव्यावर आणि चालू राजकीय-सामाजिक परिस्थितीवर प्रसिद्ध पर्यावरणवादी कार्यकर्ते सोनम वांगचुक यांनी अत्यंत रोखठोक भाष्य केले आहे. जर देशातील सध्याची परिस्थिती अशीच कायम राहिली, तर भारत २०४७ पर्यंत विकसित राष्ट्र बनण्याचे स्वप्न पूर्ण करू शकणार नाही, असा इशारा त्यांनी दिला आहे. श्रीलंका आणि बांगलादेशसारख्या देशांनी अनेक बाबतीत भारताला मागे टाकले असून, देशाला योग्य नेतृत्व मिळण्यासाठी आता एका शांततापूर्ण क्रांतीची गरज असल्याचे त्यांनी म्हटले आहे. प्रकृती ठीक नसताना त्यांनी एका व्हिडिओच्या माध्यमातून देशाच्या सद्यस्थितीवर जाहीर चिंता व्यक्त केली आहे.

सोनम वांगचुक यांच्या व्हिडिओतील ६ महत्त्वाचे मुद्दे:

• शेजारी देशांची प्रगती : ५० वर्षांपूर्वी भारताच्या बरोबरीने किंवा मागे असलेले थायलंड, मलेशिया, इंडोनेशिया, श्रीलंका आणि बांगलादेशसारखे देश आज लक्षणीयरीत्या पुढे गेले आहेत. २०४७ पर्यंत जगात सन्मानाने टिकायचे असल्यास मोठे बदल करावे लागतील.

• व्यवस्थात्मक समस्या : देशातील प्रशासकीय व व्यवस्थेतील समस्या कोणत्याही एका राजकीय पक्षापुरत्या मर्यादित नाहीत. वेगवेगळ्या पक्षांच्या सत्ताकाळातही विरोधाचे आवाज सातत्याने दाबले गेले आहेत.

• भ्रष्टाचार आणि अन्याय : २०१२-१३ च्या भ्रष्टाचारविरोधी आंदोलनानंतर सत्तेत बदल झाला तरी भ्रष्टाचार आणि अन्याय संपलेला नाही. उलट या समस्यांनी आता अधिक गंभीर आणि नवीन रूप धारण केले आहे.

• शांततापूर्ण क्रांतीची गरज : देशाला खऱ्या अर्थाने पुढे नेण्यासाठी राजकीय नेतृत्व निवडण्याच्या पद्धतीतमूलभूत बदल आवश्यक आहेत. योग्य नेतृत्व निवडण्यासाठी आता एका शांततापूर्ण क्रांतीची गरज आहे.

• निःस्वार्थी नेतृत्वाचा शोध : देश घडवण्यासाठी आपल्याला निःस्वार्थी, निर्भय, सद्गुणी आणि सक्षम लोकांच्या शोधात राहावे लागेल. नागरिकांनी आपापल्या प्रदेशातून अशा किमान एका सक्षम व्यक्तीचे नाव सुचवावे, असे आवाहन त्यांनी केले आहे.

• शिक्षण व्यवस्थेची दुर्दशा : देशाची प्रगती थेट त्याच्या शिक्षण व्यवस्थेशी जोडलेली आहे. जोपर्यंत शिक्षण व्यवस्था मागे राहील, तोपर्यंत देशाचे भविष्यही प्रगती करू शकणार नाही, असे मत त्यांनी व्यक्त केले.

जंतरमंतरवरील उपोषण आणि तब्येत बिघडल्याने हॉस्पिटलमध्ये दाखल

काही दिवसांपूर्वी नीट-यूजी (NEET-UG) परीक्षांमधील पेपरफुटी आणि अनियमिततेचा निषेध करणाऱ्या विद्यार्थ्यांच्या समर्थनार्थ सोनम वांगचुक यांनी २८ जून रोजी दिल्लीतील जंतरमंतरवर आमरण उपोषण सुरू केले होते. १८ जुलै रोजी त्यांची प्रकृती खालावल्यामुळे दिल्ली पोलिसांनी त्यांना उपोषणस्थळावरून सफदरजंग आणि नंतर मेदांता रुग्णालयात दाखल केले होते. त्यानंतर शासनाकडून ठोस आश्वासन मिळाल्यानंतर २४ जुलै रोजी त्यांनी आपले उपोषण मागे घेतले होते.