संसदेत प्रचंड गदारोळ! अमित शाह यांच्या निवेदनाविनाच लोकसभेचे कामकाज अनिश्चित काळासाठी तहकूब

नवी दिल्ली: संसदेच्या पावसाळी अधिवेशनाच्या शेवटच्या दिवशी लोकसभेत सत्ताधारी आणि विरोधकांमध्ये अभूतपूर्व गदारोळ पाहायला मिळाला. जंतरमंतरवरील आंदोलन आणि विविध मुद्द्यांवर केंद्रीय गृहमंत्री अमित शाह संसदेत महत्त्वपूर्ण निवेदन देणार होते. मात्र, विरोधकांच्या जोरदार गोंधळामुळे गृहमंत्री अमित शाह यांच्या निवेदनाविनाच लोकसभेचे कामकाज अनिश्चित काळासाठी तहकूब करण्यात आले.

सभागृहात पंतप्रधान नरेंद्र मोदी आणि गृहमंत्री अमित शाह उपस्थित असतानाही विरोधकांनी गदारोळ कायम ठेवल्याने कामकाज पुढे चालवणे अशक्य झाले.

गृहमंत्री आणि पंतप्रधानांच्या उपस्थितीत गोंधळ
पावसाळी अधिवेशनाच्या अखेरच्या दिवशी गृहमंत्री अमित शाह जंतरमंतर आंदोलनावर सरकारची भूमिका मांडणार असल्याने सर्वांचेच लक्ष या निवेदनाकडे लागले होते. गृहमंत्री शाह यांनीही आपण कोणत्याही विषयावर संसदेत चर्चा करण्यास तयार असल्याचे आधीच स्पष्ट केले होते. कामकाजात सहभागी होण्यासाठी पंतप्रधान नरेंद्र मोदी आणि गृहमंत्री अमित शाह सभागृहात दाखल झाले, मात्र दोन्ही नेते येताच विरोधकांनी वेलमध्ये उतरून जोरदार घोषणाबाजी सुरू केली.

 लोकसभा अध्यक्षांनी सदस्यांना शांत राहून कामकाज चालू देण्याचे वारंवार आवाहन केले, परंतु विरोधकांचा गोंधळ न थांबल्याने अखेर अध्यक्षांनी कामकाज अनिश्चित काळासाठी स्थगित करत अधिवेशनाचे सूप वाजवले.

संसदेच्या मकर गेटवर विरोधकांची तीव्र निदर्शने

सभागृहाचे कामकाज सुरू होण्यापूर्वी सकाळी १०:३० वाजताच विरोधकांनी संसदेच्या मकर गेटजवळ जोरदार निदर्शने केली. २० जुलै रोजी जंतरमंतरवर विद्यार्थ्यांवर झालेला लाठीमार आणि राम मंदिर चोरीच्या मुद्द्यावर गृहमंत्री अमित शाह यांनी संसदेत उत्तर द्यावे, अशी मागणी करत विरोधी पक्षाच्या खासदारांनी सरकारविरोधात तीव्र घोषणाबाजी केली.

किरेन रिजिजू आणि अमित शाहंचा पलटवार
विरोधकांच्या या भूमिकेवर संसदीय कार्यमंत्री किरेन रिजिजू यांनी तीव्र नाराजी व्यक्त केली. "माझ्या ३० वर्षांच्या प्रदीर्घ कार्यकाळात मी विरोधकांना इतक्या बेजबाबदारपणे वागताना कधीही पाहिले नाही," असा टोला रिजिजू यांनी लगावला.

 तर दुसरीकडे, गृहमंत्री अमित शाह यांनी विरोधकांच्या या गोंधळावर निशाणा साधत म्हटले की, "मी संसदेत कोणत्याही चर्चेसाठी पूर्णपणे तयार होतो. मात्र, विरोधकांचा उद्देश चर्चा करणे हा नसून केवळ सभागृहात गोंधळ घालणे हाच आहे."