हार्दिक पांड्यासाठी दिल्लीची मोठी ऑफर! अक्षर पटेलसह 'या' स्टार खेळाडूचा ट्रेड प्रस्ताव, मुंबईचा निर्णय बाकी

मुंबई (प्रतिनिधी) : आयपीएलच्या आगामी हंगामापूर्वी मुंबई इंडियन्सचा कर्णधार हार्दिक पांड्याच्या संभाव्य ट्रेडची चर्चा रंगली आहे. हार्दिकला आपल्या संघात सामील करण्यासाठी अनेक फ्रँचायझींनी रस दाखवला असून, आता दिल्ली कॅपिटल्सनेही मोठा प्रस्ताव दिल्याची चर्चा आहे.

माध्यमांतील वृत्तांनुसार, दिल्ली कॅपिटल्सने हार्दिक पांड्याच्या बदल्यात आपला कर्णधार अक्षर पटेल आणि सलामीवीर पृथ्वी शॉ यांना मुंबई इंडियन्सकडे देण्याची तयारी दर्शवली आहे. या प्रस्तावावर मुंबई इंडियन्स काय निर्णय घेणार, याकडे क्रिकेट चाहत्यांचे लक्ष लागले आहे.

याआधी चेन्नई सुपर किंग्जनेही हार्दिकसाठी मोठी ऑफर दिल्याची चर्चा होती. शिवम दुबे, डेवाल्ड ब्रेव्हिस आणि रोख रक्कम असा प्रस्ताव सीएसकेने दिल्याचे वृत्त होते. मात्र, मुंबईने आयुष म्हात्रेचा समावेश करण्याची अट ठेवल्याने दोन्ही संघांमधील चर्चा पुढे सरकली नाही.

हार्दिक पांड्याला ट्रेड करण्यामागे मुंबई इंडियन्सच्या अलीकडच्या कामगिरीचाही संदर्भ दिला जात आहे. गुजरात टायटन्सकडून संघात परतल्यानंतर त्याला कर्णधारपद देण्यात आले होते. मात्र, त्याच्या नेतृत्वाखाली मुंबईला अपेक्षित यश मिळाले नाही. संघातील अंतर्गत मतभेद, सलग निराशाजनक हंगाम आणि हार्दिकचा वैयक्तिक फॉर्म या सर्व कारणांमुळे फ्रँचायझी नव्या पर्यायांचा विचार करत असल्याची चर्चा आहे.

दरम्यान, या ट्रेडबाबत अद्याप कोणतीही अधिकृत घोषणा झालेली नाही. त्यामुळे हार्दिक पांड्या पुढील हंगामात मुंबईकडून खेळणार की नव्या संघाच्या जर्सीत दिसणार, हे येत्या काळात स्पष्ट होणार आहे.