7 किमी बस फिरवत 2 तास महिलेवर अत्याचार;दिल्ली पुन्हा हादरली

दिल्ली (प्रतिनिधी) : राजधानी दिल्लीत एका खासगी बसमध्ये महिलेसोबत सामूहिक अत्याचार झाल्याचे प्रकरण समोर आले आहे. पोलिसांच्या माहितीनुसार, ही घटना १२ मे रोजी घडली आहे. महिलेची तक्रार मिळाल्यानंतर पोलिसांनी तातडीने कारवाई करत गुन्हा दाखल केला आणि तपास सुरू केला. या प्रकरणी बसचा ड्रायव्हर आणि कंडक्टर या दोघांना अटक करण्यात आली आहे.

पोलीस अधिकाऱ्यांनी दिलेल्या माहितीनुसार, पीडित महिला विवाहित असून तिला तीन मुले आहेत.तक्रार मिळाल्यानंतर महिलेची वैद्यकीय तपासणी  करण्यात आली.वैद्यकीय प्रक्रिया पूर्ण झाल्यानंतर पोलिसांनी एफआयआर नोंदवला. यानंतर दोन्ही आरोपींना ताब्यात घेऊन त्यांची चौकशी करण्यात आली आणि नंतर त्यांना अटक करण्यात आली.दिल्ली पोलिसांनी ती खासगी बस ताब्यात घेतली आहे, ज्यामध्ये महिलेसोबत सामूहिक बलात्काराची घटना घडल्याचा आरोप आहे. तपासात मदत होईल असे पुरावे गोळा करण्यासाठी पोलीस आता बसची फॉरेन्सिक तपासणी करत आहेत.

अधिकाऱ्यांच्या माहितीनुसार, बसच्या आतून आवश्यक नमुने घेण्यात आले असून तांत्रिक पथक संपूर्ण वाहनाची बारकाईने तपासणी करत आहे. यासोबतच बसमधील आणि रस्त्यावरील सीसीटीव्ही कॅमेऱ्यांचे फुटेजही तपासले जात आहे. घटनेच्या वेळी बस नेमकी कुठे-कुठे गेली होती, याचा शोध घेण्याचा पोलीस प्रयत्न करत आहेत.

महिलेच्या जबाबाच्या आधारे एफआयआर (FIR) नोंदवण्यात आला असून या प्रकरणाचा तपास सुरू करण्यात आला आहे. पोलिसांनी दिलेल्या माहितीनुसार, संबंधित बस जप्त करण्यात आली असून दोन्ही आरोपींना अटक करण्यात आली आहे. या प्रकरणाचा सर्व संभाव्य बाजूंनी तपास केला जात असल्याचेही अधिकाऱ्यांनी सांगितले. या घटनेतील बस 'रॉयल ट्रॅव्हल्स अँड कार्गो' या कंपनीची असल्याचे निष्पन्न झाले आहे. या कंपनीचे मुख्य कार्यालय फरिदाबादमधील श्री हरी प्लाझा येथे असल्याचे समजते.

या घटनेवर प्रतिक्रिया देताना आम आदमी पक्षाचे नेते सौरभ भारद्वाज यांनी 'X' वर पोस्ट करत संताप व्यक्त केला आहे. त्यांनी म्हटले आहे की, "अतिशय लाजीरवाणी घटना आहे. 'निर्भया' प्रकरणाची पुनरावृत्ती झाली आहे. एका ३० वर्षीय महिलेला रात्री वेळ विचारण्याच्या बहाण्याने बसमध्ये ओढण्यात आले. त्यानंतर चालत्या बसमध्ये सुमारे २ तास अनेक जणांनी तिच्यावर बलात्कार केला. दिल्लीच्या राणी बाग परिसरात ७ किलोमीटरपर्यंत ही बस फिरत होती."