'अर्बन बँकिंग अधिक सक्षम करण्यासाठी सरकार कटिबद्ध'; केंद्रीय गृहमंत्री अमित शाह यांच्या हस्ते मुंबईत NUCFDC च्या मुख्यालयाचे उद्घाटन!
mazamaharashtra 
मुंबई: "देशातील नागरी सहकारी बँकांचे (Urban Co-operative Banks) जाळे अधिक सक्षम, आधुनिक आणि सुरक्षित करण्यासाठी केंद्र सरकार पूर्णपणे कटिबद्ध आहे," अशी ग्वाही केंद्रीय गृह व सहकार मंत्री अमित शाह यांनी दिली. दोन दिवसांच्या मुंबई दौऱ्यावर असलेल्या अमित शाह यांच्या हस्ते आज (८ ऑगस्ट) 'नॅशनल अर्बन को-ऑपरेटिव्ह फायनान्स अँड डेव्हलपमेंट कॉर्पोरेशन'च्या (NUCFDC) नवनिर्मित मुख्यालयाचे दिमाखात उद्घाटन पार पडले.
'सहकारातून समृद्धी' अन् आधुनिक तंत्रज्ञान
सहकार क्षेत्राला बळकटी देण्यासाठी उभारण्यात आलेल्या या कार्यालयाचे उद्घाटन केल्यानंतर उपस्थितांना संबोधित करताना अमित शाह म्हणाले, "पंतप्रधान नरेंद्र मोदी यांच्या 'सहकारातून समृद्धी' या संकल्पनेला साकार करण्यासाठी सहकारी बँकांनी काळासोबत बदलणे अत्यंत गरजेचे आहे."
नागरी सहकारी बँकांची सायबर सुरक्षा, तांत्रिक क्षमता आणि संस्थात्मक सक्षमीकरण वाढवण्यासाठी NUCFDC आणि 'नॅशनल फॉरेन्सिक सायन्सेस युनिव्हर्सिटी'मध्ये झालेल्या सामंजस्य कराराचे (MoU) त्यांनी विशेष कौतुक केले. लहान आणि मध्यम बँकांना आधुनिक तंत्रज्ञान स्वीकारण्याचा खर्च कमी व्हावा, जेणेकरून त्या खाजगी बँकांशी प्रभावीपणे स्पर्धा करू शकतील, हा या 'अम्ब्रेला' संघटनेचा मुख्य उद्देश असल्याचे त्यांनी स्पष्ट केले. "या संस्थेमुळे अर्बन बँकिंगचा मोठा विस्तार होईल आणि पुढील १०० वर्षांपर्यंत हेच कार्यालय शेअर बाजाराचा कणा म्हणून काम करेल," असा विश्वासही त्यांनी व्यक्त केला.
सहकारी बँकिंग क्षेत्राच्या ताकदीवर प्रकाश टाकताना अमित शाह यांनी सांगितले की, "देशातील सुमारे १,४०० शहरी सहकारी बँकांमध्ये तब्बल ६ लाख कोटी रुपयांचा निधी जमा आहे. विशेष म्हणजे, लहान सहकारी बँकांमधील कर्जवसुलीचा दर १०० टक्क्यांच्या जवळपास आहे." डिजिटल व्यवहार अधिक सुरक्षित करण्यासाठी आणि सायबर सुरक्षेला बळ देण्यासाठी व्यापक उपाययोजना सुरू असल्याचेही त्यांनी नमूद केले.
