मोठी बातमी : संजीवराजे निंबाळकर ,रघुनाथराजे निंबाळकर यांच्या घरावर आयकर विभागाचा छापा

सातारा : सातारा जिल्ह्यात खळबळ उडवून देणारी बातमी समोर येत आहे. विधानपरिषदेचे माजी सभापती रामराजे नाईक निंबाळकर यांचे चुलत बंधू सातारा जिल्हा परिषदेचे माजी अध्यक्ष संजीवराजे नाईक निंबाळकर यांच्या घरावर  आज आयकर विभागाने छापेमारी केली आहे. ही छापेमारी झाल्याने जिल्ह्यामध्ये मोठी खळबळ उडाली आहे. संजीवराजे आणि रघुनाथराजे निंबाळकर यांचे निवासस्थान असलेल्या जय व्हिला आणि सरोज व्हिला येथे आज सकाळी ६ वाजता आयकर विभागाची पथके दाखल झाली आहेत .सकाळपासून संजीवराजे यांची चौकशी आयकर विभागाच्या पथकाकडून करण्यात येत आहे.

संजीवराजे व रघुनाथराजे यांनी आताच्या विधानसभा निवडणुकीत शरद पवार गटात प्रवेश केला होता; परंतु सध्या संजीवराजे हे पुन्हा अजितदादांच्या गटात प्रवेश करणार असल्याच्या चर्चा सुरू असतानाच आज आयकर विभागाने टाकलेल्या छाप्याने सध्या जिल्ह्यात खळबळ माजली आहे. सध्या संजीवराजे यांच्या निवासस्थानी कार्यकर्त्यांनी गर्दी करण्यास सुरुवात केली असून, या ठिकाणी मोठा पोलीस बंदोबस्तही तैनात करण्यात आला आहे.

कार्यकर्त्यांची बंगल्याबाहेर गर्दी 

एकाच वेळी पुणे, मुंबई आणि फलटण येथे छापेमारी झाली आहे. बंगल्यामध्ये कोणालाही प्रवेश दिला जात नसून बाहेर कार्यकर्त्यांनी मोठ्या प्रमाणात गर्दी केल्याचं पाहायला मिळालं. तर निंबाळकर कुटुंबियांनी कार्यकर्त्यांना गर्दी करू नका असे आवाहन केले आहे. रघुनाथराजे यांचे स्वीय सहायक महेश ढवळे यांच्यावर घरावरही छापेमारी करण्यात आली आहे. आयकर विभागातील अधिकारी घरातील सोन्या चांदीच्या वस्तू कुठून आल्या त्यासोबतच आर्थिक व्यवहारांबाबत विचारणा केली जात आहे.

संजीवराजे आणि रघुनाथराजे यांच्यावर या आयकर विभागाची छापेमारी का करण्यात आली याबाबत कोणतीही माहिती समोर आलेली नाही . मात्र अचानक पडलेल्या या धाडीमुळे सातारा जिल्ह्यात मोठी खळबळ उडाली आहे.