सुप्रीम कोर्टात शिवसेनेच्या चिन्हावर सुनावणी; एकनाथ शिंदेंचा मंत्र्यांना महत्त्वाचा आदेश

नवी दिल्ली/मुंबई:शिवसेना पक्षनाव आणि अधिकृत 'धनुष्यबाण' चिन्हाच्या वादावर आज सर्वोच्च न्यायालयात दुपारी २ वाजता पुन्हा अत्यंत महत्त्वाची सुनावणी पार पडणार आहे. कोर्टातील या कायदेशीर लढाईच्या पार्श्वभूमीवर राजकीय घडामोडींना जोरदार वेग आला असून, मुख्यमंत्री एकनाथ शिंदे यांनी सुनावणीआधीच आपल्या पक्षातील सर्व नेते, आमदार, खासदार आणि मंत्र्यांना महत्त्वाचे आदेश दिले आहेत.

कोर्टात काय घडतंय?
सुप्रीम कोर्टात उद्धव ठाकरे गटाच्या वतीने ज्येष्ठ कायदेतज्ज्ञ कपिल सिब्बल जोरदार युक्तिवाद करत आहेत. सिब्बल यांनी पक्षातील संघटनात्मक नियम, पक्षाची मूळ घटना आणि पक्षप्रमुखांचे अधिकार यावर जोर देत मुख्य पद हे उद्धव ठाकरे यांच्याकडेच असल्याचा दावा न्यायालयात मांडला आहे. ठाकरे गटाच्या या आक्रमक युक्तिवादानंतर राजकीय वर्तुळात विविध चर्चा रंगल्या आहेत.

 शिंदे गटाचा विश्वास आणि मुख्यमंत्र्यांचा आदेश:
कोर्टातील या सुनावणीच्या पार्श्वभूमीवर शिंदे गटाच्या नेत्यांनी अंतिम निकाल आपल्याच बाजूने लागेल असा विश्वास व्यक्त केला आहे. दुसरीकडे, मुख्यमंत्री एकनाथ शिंदे यांनी पक्षातील नेत्यांना 'श्रद्धा आणि सबुरी' बाळगण्याचा सल्ला दिला आहे.

आमदार, खासदार व मंत्र्यांना मार्गदर्शन करताना मुख्यमंत्री म्हणाले; "आपण राजकीय परीक्षेत निश्चित पास होऊ. आपल्याकडे स्पष्ट संख्याबळ आहे. जेव्हा आपली बाजू न्यायालयात मांडली जाईल, तेव्हा विरोधकांची तोंडे आपोआप बंद होतील. सध्या कोणत्याही अफवा किंवा बातम्यांवर लक्ष न देता आपापल्या विभागात जोमाने कामाला लागा. पक्षसंघटना मजबूत करण्यासाठी पदाधिकारी व कार्यकर्त्यांच्या नियमित बैठका घ्या."

 मंत्रालयातील बैठकांचे सत्र:
सुनावणीच्या घडामोडींनंतर मुख्यमंत्र्यांनी सर्व मंत्र्यांची महत्त्वपूर्ण बैठक बोलावली आहे. मंत्रालयात नियमित मंत्रिमंडळ बैठक पार पडल्यानंतर मुख्यमंत्री शिंदे आपल्या दालनात सार्वजनिक आरोग्य विभागासंदर्भात विशेष आढावा बैठक घेणार आहेत. कोर्टातील निकालाच्या शक्यतेसोबतच मंत्रालयातील या उच्चस्तरीय बैठकांकडे आता संपूर्ण महाराष्ट्राचे लक्ष लागले आहे.