अहिल्यादेवींचे समाजहिताचे कार्य आजही प्रेरणादायी- समाजकल्याण सभापती श्रद्धाताई गायकवाड

हेरवाड (प्रतिनिधी): पुण्यश्लोक अहिल्यादेवी होळकर यांचे जीवनकार्य हे समाजसेवा, न्यायप्रियता आणि लोककल्याणकारी राज्यकारभाराचा आदर्श नमुना आहे. त्यांनी समाजहितासाठी केलेले कार्य आजही प्रेरणादायी आहे. नव्या पिढीने त्यांच्या विचारांचा वारसा जपत समाजाच्या विकासासाठी योगदान द्यावे, असे प्रतिपादन जिल्हा परिषदेच्या समाजकल्याण सभापती श्रद्धाताई गायकवाड यांनी केले.

त्या हेरवाड येथे आयोजित पुण्यश्लोक अहिल्यादेवी होळकर जयंती कार्यक्रमात बोलत होत्या. यावेळी जिल्हा परिषदेच्या समाजकल्याण सभापती श्रद्धाताई गायकवाड व मान्यवरांच्या हस्ते अहिल्यादेवींच्या प्रतिमेचे पूजन करून अभिवादन करण्यात आले.

कार्यक्रमात बोलताना श्रद्धाताई गायकवाड यांनी अहिल्यादेवी होळकर यांच्या कार्याचा गौरवपूर्ण आढावा घेतला. न्यायप्रिय, लोकाभिमुख आणि विकासाभिमुख राज्यकारभारातून अहिल्यादेवींनी इतिहासात अजरामर स्थान मिळविले असून त्यांचे जीवन आजच्या पिढीसाठी प्रेरणादायी असल्याचे त्यांनी सांगितले. समाजातील दुर्बल घटकांच्या उन्नतीसाठी त्यांनी केलेले कार्य तसेच महिला सक्षमीकरणासाठी दिलेले योगदान अनुकरणीय असल्याचेही त्यांनी नमूद केले.

 यावेळी पंचायत समितीचे सभापती मिलिंद कुरणे यांनीही मनोगत व्यक्त करताना अहिल्यादेवींच्या विचारांचा वारसा जपण्याचे आवाहन केले. समाजाच्या सर्वांगीण प्रगतीसाठी त्यांचे विचार आजही मार्गदर्शक ठरत असल्याचे त्यांनी सांगितले. यावेळी बाबासाहेब नदाफ यांनीही आपल्या मनोगतातून पुण्यश्लोक अहिल्यादेवी होळकर यांच्या कार्याचा आढावा घेतला. कार्यक्रमादरम्यान समाजातील विविध क्षेत्रांत उल्लेखनीय कार्य करणाऱ्या व्यक्तींचा सत्कार करण्यात आला. तसेच शिक्षण, सामाजिक, सांस्कृतिक व क्रीडा क्षेत्रात विशेष यश संपादन केलेल्या गुणवंतांचाही गौरव करण्यात आला. कार्यक्रमास ग्रामस्थ, महिला, युवक तसेच विविध संस्थांचे पदाधिकारी मोठ्या संख्येने उपस्थित होते. कार्यक्रमाचे स्वागत व प्रास्ताविक बंडू बरगाले यांनी केले. उपस्थित मान्यवरांचे स्वागत करून आयोजकांनी कार्यक्रम यशस्वी करण्यासाठी विशेष परिश्रम घेतले. शेवटी उपस्थितांचे आभार मानून कार्यक्रमाची सांगता करण्यात आली.

 यावेळी अध्यक्ष सरपंच रेखाताई जाधव, सीमा बरगाले, दीपा बरगाले, संतोष पुजारी, सुरज कोरूचे, दगडू अकिवाटे, अभिजित ढोणे, वैभव अकिवाटे, समर्थ अकिवाटे, लक्ष्मण बरगाले, रोहन पुजारी, श्रीवर्धन बरगाले आदी मोठ्या संख्येने उपस्थित होते. आभार शंकर बरगाले यांनी मानले.