आंदोलनाच्या पहिल्याच दिवशी धर्मेंद्र प्रधान राजीनामा देणार होते, पण…; भाजप मंत्र्याचा मोठा दावा, राजकीय वर्तुळात खळबळ

नवी दिल्ली : कॉकरोच जनता पार्टीच्या तब्बल महिनाभर चाललेल्या तीव्र आंदोलनानंतर २५ जुलै रोजी केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिला. त्यांच्या राजीनाम्यानंतर आता शिक्षण मंत्रालयाची अतिरिक्त जबाबदारी कॅबिनेट मंत्री प्रल्हाद जोशी यांच्याकडे सोपवण्यात आली आहे. विद्यार्थ्यांना मिळालेल्या या मोठ्या यशानंतर 'केंद्र सरकारने राजीनाम्यासाठी एवढा वेळ का लावला?' असा सवाल उपस्थित केला जात असतानाच, भाजपचे ज्येष्ठ नेते व मध्य प्रदेशचे मंत्री कैलास विजयवर्गीय यांनी यावर एक सनसनाटी दावा केला आहे.

"पक्षाने राजीनामा रोखून धरला होता" - कैलास विजयवर्गीय

इंदूरमध्ये पत्रकारांशी बोलताना कैलास विजयवर्गीय म्हणाले, "विद्यार्थ्यांचे दिल्लीतील आंदोलन सुरू होताच पहिल्याच दिवशी धर्मेंद्र प्रधान यांनी भाजपच्या केंद्रीय नेतृत्वाकडे राजीनामा देण्याची तयारी दर्शवली होती. त्यांनी नेतृत्वाला सांगितले होते की, 'जर गरज असेल तर मी पदाचा राजीनामा देण्यास तयार आहे.' मात्र, पक्षाच्या वरिष्ठांनी त्यांना थांबण्यास सांगितले. कोणताही अंतिम निर्णय होईपर्यंत राजीनामा सादर करू नये किंवा त्याबाबत बाहेर वाच्यता करू नये, असा सल्ला प्रधानांना देण्यात आला होता."

पुढे बोलताना त्यांनी विरोधकांवर निशाणा साधला आणि म्हटले की, "बांगलादेश आणि श्रीलंकेप्रमाणे भारतात हिंसाचार पसरवून देशाला अस्थिर करू पाहणाऱ्या परकीय शक्तींचे मनसुबे या राजीनाम्यामुळे उधळले गेले आहेत."

"पदापेक्षा देश आणि विद्यार्थी महत्त्वाचे" - गृहमंत्री अमित शाह

धर्मेंद्र प्रधान यांच्या राजीनाम्यावर केंद्रीय गृहमंत्री अमित शाह यांनी प्रतिक्रिया देत भाजप कार्यकर्त्यांसाठी पदापेक्षा देश आणि विद्यार्थी महत्त्वाचे असल्याचे सांगितले. अमित शाह म्हणाले, "मोदी सरकार देशातील तरुणांच्या भावनांचा आदर करते. पेपरफुटीच्या घटनांमधील दोषींना कठोर शिक्षा व्हावी, यासाठी पंतप्रधान मोदी कटिबद्ध आहेत. धर्मेंद्र प्रधान यांनी आपल्या कार्यकाळात राष्ट्रीय शैक्षणिक धोरण (NEP) आणि 'पीएम श्री' शाळांसारख्या ऐतिहासिक सुधारणा राबवल्या आहेत. वैयक्तिक हितापेक्षा राष्ट्रीय हिताला प्राधान्य देण्याची परंपरा त्यांनी पुन्हा एकदा अधोरेखित केली आहे."