मध्य प्रदेश राज्यसभा निवडणुकीत काँग्रेसला धक्का; भाजपचा तिन्ही जागांवर मार्ग मोकळा

मुंबई (प्रतिनिधी) : देशातील राज्यसभेच्या 24 जागांसाठी 18 जून रोजी निवडणूक होणार असून या पार्श्वभूमीवर विविध राज्यांमध्ये राजकीय घडामोडींना वेग आला आहे. मध्य प्रदेशातील राज्यसभा निवडणुकीत मात्र मतदानापूर्वीच मोठा राजकीय ट्विस्ट पाहायला मिळाला आहे. काँग्रेसच्या उमेदवार मिनाक्षी नटराजन यांचा उमेदवारी अर्ज बाद ठरवल्यानंतर भाजपच्या तिन्ही उमेदवारांच्या विजयाचा मार्ग जवळपास मोकळा झाला आहे.मध्य प्रदेशात राज्यसभेच्या तीन जागांसाठी निवडणूक होत आहे. विधानसभा संख्याबळाच्या आधारे दोन जागांवर भाजपचा विजय निश्चित मानला जात होता. मात्र, तिसऱ्या जागेसाठी काँग्रेसने माजी खासदार आणि पक्षाच्या वरिष्ठ नेत्या मिनाक्षी नटराजन यांना उमेदवारी दिली होती. त्यामुळे या जागेवर भाजप आणि काँग्रेसमध्ये थेट लढत होण्याची शक्यता व्यक्त केली जात होती.

काँग्रेसला या जागेवर विजयाची आशा असल्याने पक्षाने आपल्या आमदारांची एकजूट कायम ठेवण्यासाठी विशेष रणनीती आखली होती. क्रॉस व्होटिंग टाळण्यासाठी काँग्रेस आमदारांना विशेष विमानाने बंगळुरू येथे हलवून तेथे ठेवण्याची तयारी सुरू होती. कर्नाटकचे उपमुख्यमंत्री डी. के. शिवकुमार यांच्याशी संबंधित रिसॉर्टमध्ये आमदारांना ठेवण्याचा पक्षाचा विचार होता. मात्र, या योजनेची अंमलबजावणी होण्यापूर्वीच राजकीय समीकरणे बदलणारी घटना घडली.

उमेदवारी अर्जांची छाननी करताना मिनाक्षी नटराजन यांच्या प्रतिज्ञापत्रात महत्त्वाची माहिती लपवण्यात आल्याचा मुद्दा समोर आला. त्यांच्याविरुद्ध सुरू असलेल्या एका कायदेशीर प्रकरणाचा उल्लेख त्यांनी अर्जासोबत सादर केलेल्या प्रतिज्ञापत्रात केला नसल्याचा आरोप भाजपने केला होता. यासंदर्भात भाजपने निवडणूक आयोगाकडे औपचारिक तक्रारही दाखल केली होती.या तक्रारीची दखल घेत रिटर्निंग ऑफिसर अरविंद शर्मा यांनी अर्जाची तपासणी केली. तपासणीत संबंधित प्रकरणाबाबत उमेदवाराला माहिती असूनही त्याचा प्रतिज्ञापत्रात उल्लेख करण्यात आला नसल्याचे आढळल्याचा निष्कर्ष अधिकाऱ्यांनी नोंदवला. निवडणूक नियमांनुसार उमेदवाराने सर्व आवश्यक माहिती देणे बंधनकारक असते. अपूर्ण प्रतिज्ञापत्र सादर करणे आणि तथ्ये लपवणे हे नियमांचे उल्लंघन मानले जात असल्याने नटराजन यांचा अर्ज बाद करण्यात आला.

या निर्णयानंतर मध्य प्रदेशातील राजकीय वातावरण चांगलेच तापले आहे. भाजपने या निर्णयाचे स्वागत करत याला ‘सत्याचा विजय’ असे म्हटले आहे. तर काँग्रेसने हा निर्णय लोकशाही प्रक्रियेला धक्का देणारा असल्याचा आरोप केला आहे. पक्षाच्या मते, ज्या प्रकरणाचा आधार घेऊन अर्ज बाद करण्यात आला ते कायदेशीरदृष्ट्या प्रलंबित गुन्हेगारी प्रकरण मानले जाऊ शकत नाही. त्यामुळे त्याचा प्रतिज्ञापत्रात उल्लेख करणे आवश्यक नव्हते.अर्ज बाद झाल्यानंतर काँग्रेसने तातडीने न्यायालयात धाव घेतली आहे. तसेच पक्षाचे वरिष्ठ नेते जयराम रमेश, भूपेश बघेल, सचिन पायलट आणि के. सी. वेणुगोपाल यांनी नवी दिल्लीत निवडणूक आयोगाच्या कार्यालयात जाऊन निषेध नोंदवला. पक्षाने निवडणूक आयोगाकडे लेखी निवेदन सादर करत निर्णयाचा पुनर्विचार करण्याची मागणी केली आहे.

दरम्यान, या संपूर्ण घडामोडीमुळे मध्य प्रदेशातील राज्यसभा निवडणुकीचे चित्र पूर्णपणे बदलले आहे. काँग्रेसचा एकमेव उमेदवार रिंगणाबाहेर गेल्याने भाजपच्या तिन्ही उमेदवारांच्या बिनविरोध निवडीची शक्यता बळावली आहे. मतदानापूर्वीच निर्माण झालेल्या या नाट्यमय परिस्थितीमुळे मध्य प्रदेशातील राज्यसभा निवडणूक राष्ट्रीय पातळीवरील चर्चेचा विषय ठरली आहे.