अशोकराव माने इन्स्टिट्यूटची कॅम्पस प्लेसमेंटमध्ये उत्तुंग भरारी; २९४ विद्यार्थ्यांची नामांकित कंपन्यांमध्ये निवड

वाठार तर्फ वडगाव (प्रतिनिधी): श्री बाळासाहेब माने शिक्षण प्रसारक मंडळ संचलित अशोकराव माने ग्रुप ऑफ इन्स्टिट्यूशन्सने कॅम्पस प्लेसमेंट क्षेत्रात पुन्हा एकदा आपल्या गुणवत्तेचा आणि यशाचा ठसा उमटवला आहे. संस्थेतील अंतिम वर्षातील तब्बल २९४ विद्यार्थ्यांची राष्ट्रीय व आंतरराष्ट्रीय स्तरावरील नामांकित कंपन्यांमध्ये निवड झाली आहे.

विशेष म्हणजे, यातील २८ विद्यार्थ्यांनी दोन वेगवेगळ्या कंपन्यांमध्ये आपली निवड निश्चित करत दुहेरी यश संपादन केले आहे, अशी माहिती संस्थेचे अध्यक्ष विजयसिंह माने यांनी दिली.

७.२ लाखांपर्यंतचे आकर्षक वार्षिक पॅकेज

निवड झालेल्या विद्यार्थ्यांना कंपन्यांकडून वार्षिक ३.२ लाख ते ७.२ लाख रुपयांपर्यंतचे आकर्षक पॅकेज मिळाले आहे. यामध्ये आयटी क्षेत्रासह कोअर इंजिनिअरिंग क्षेत्रातील आघाडीच्या TCS, इन्फोसिस, विप्रो, मायक्रो लँड, सुजलोन, अदानी सिमेंट, टाटा ऑटो कंपोनंट, भारत फोर्ज, एवर इलेक्ट्रॉनिक्स आणि एलकॉम यांसारख्या अनेक दिग्गज कंपन्यांचा समावेश आहे.

३५० तासांचे मोफत विशेष प्रशिक्षण

विद्यार्थ्यांच्या या यशाबद्दल बोलताना अध्यक्ष विजयसिंह माने म्हणाले, "विद्यार्थ्यांना उद्योग जगताच्या गरजेनुसार सक्षम बनवण्यासाठी महाविद्यालयातर्फे अॅप्टीट्यूड, सॉफ्ट स्किल्स, कोडिंग, आणि मुलाखत कौशल्यांवर आधारित ३५० तासांचे मोफत प्रशिक्षण दिले जाते. विविध आंतरराष्ट्रीय संस्थांशी केलेल्या सामंजस्य करारांमुळे (MoU) आमच्या विद्यार्थ्यांना मोठ्या संधी उपलब्ध होत आहेत."

उद्योगाभिमुख शिक्षणाचा फायदा

कॅम्पस डायरेक्टर प्रा. डॉ. पी. बी. घेवारी आणि संचालक प्रा. डॉ. संगीता चौगुले यांनी विद्यार्थ्यांना केवळ पदवीधर न बनवता उद्योगविश्वासाठी कौशल्यसंपन्न अभियंते म्हणून घडवण्यावर भर दिला असल्याचे सांगितले. प्रकल्पाधारित शिक्षण, इंटर्नशिप आणि तांत्रिक कौशल्यांमुळे विद्यार्थ्यांना हे यश मिळवणे शक्य झाले.

या यशाबद्दल संस्थेचे अध्यक्ष विजयसिंह माने, संचालक मनिषा माने, प्रा. डॉ. संगीता चौगुले, कॅम्पस डायरेक्टर प्रा. डॉ. पी. बी. घेवारी, ट्रेनिंग व प्लेसमेंट ऑफिसर प्रा. अविनाश उथळे, प्रा. अमोल पाटील व सर्व प्राध्यापकांनी विद्यार्थ्यांचे मनःपूर्वक अभिनंदन केले.