पेलेट गन प्रकरणात मोठा खुलासा! RAF च्या 'ऑपरेशनल लॅप्स'ची नोंद; राहुल गांधींच्या पत्रानंतर चौकशीत धक्कादायक माहिती

मुंबई (प्रतिनिधी) : दिल्लीतील विद्यार्थी आंदोलनादरम्यान झालेल्या पेलेट गन वापर प्रकरणात चौकशीत महत्त्वाची माहिती समोर आली आहे. वृत्तानुसार, रॅपिड ॲक्शन फोर्स (RAF) च्या एका जवानाने पेलेट गनमधून सात फैरी झाडल्या, त्यापैकी पाच आंदोलकांना लागल्या, तर दोन जमिनीवर आदळल्या

या घटनेत दोन विद्यार्थी आणि एका पत्रकारासह किमान तीन जण जखमी झाल्याचे सांगितले जात आहे. यापैकी एका विद्यार्थ्याच्या डोळ्याला गंभीर दुखापत झाल्याचा मुद्दा लोकसभेतील विरोधी पक्षनेते राहुल गांधी यांनी उपस्थित करत केंद्रीय गृहमंत्री अमित शाह यांना पत्रही लिहिले आहे.

दरम्यान, CRPF च्या अंतर्गत चौकशीत गर्दी नियंत्रणादरम्यान वापरण्यात आलेली बळाची पद्धत निर्धारित मानकांनुसार नसल्याचे आणि 'ऑपरेशनल लॅप्स' झाल्याचे निरीक्षण नोंदवण्यात आल्याची माहिती समोर आली आहे.

तथापि, सुरक्षा यंत्रणांच्या सूत्रांचे म्हणणे आहे की, आंदोलकांकडून दगडफेक आणि सुरक्षा कर्मचाऱ्यांवर हल्ला झाल्यानंतरच पेलेट गनचा वापर करण्यात आला. या दाव्याची स्वतंत्र पडताळणी अद्याप झालेली नाही.

घटनेनंतर वरिष्ठ अधिकाऱ्यांनी भविष्यात अशा परिस्थितीत पेलेट गनसारख्या कठोर उपायांपूर्वी इशारा देणे, तसेच लाठीचार्ज किंवा अश्रुधूर यांसारख्या पर्यायांचा वापर करण्याच्या सूचनाही दिल्या आहेत. संपूर्ण प्रकरणाचा सविस्तर आढावा अद्याप सुरू असून अंतिम चौकशी अहवालाकडे सर्वांचे लक्ष लागले आहे.