पवार साहेबांचा कार्यकर्ता रडणारा नाही लढणारा ;जयंत पाटील यांचे कार्यकर्त्यांना पत्र

सांगली : राष्ट्रवादी काँग्रेस पार्टी शरदचंद्र पक्षाचे प्रदेशाध्यक्ष जयंत पाटील यांनी नववर्षाच्या शुभेच्छा देत  कार्यकर्त्यांना एक पत्र लिहिले आहे. या पत्राच्या माध्यमातून जयंत पाटील यांनी कार्यकर्त्यांना लढण्याचे आवाहन केले आहे. 

नेमकं काय लिहिलंय पत्रात ?

राष्ट्रवादी काँग्रेस पक्ष - शरदचंद्र पवार परिवारातील सर्व सदस्य, आपल्या सर्वांना नवीन वर्षाच्या मनःपुर्वक शुभेच्छा...2024 हे वर्ष आपल्या पक्षासाठी अत्यंत संमिश्र असे वर्ष होते. एकीकडे आपल्या पक्षाचे लोकसभेत सर्वाधिक 8 खासदार निवडून आले. दुसरीकडे विधानसभा निवडणुकीत अपेक्षेपेक्षा कमी यश मिळाले.

या अपयशाची कारणीमिमांसा विविध स्तरांवर चालू आहे. आता दिन दुबळ्यांची, पददलितांची, शेतकरी, कामगार व महिलांची लढाई पुन्हा एकदा नव्याने लढण्यासाठी सज्ज व्हायचे. सह्याद्री सारख्या कणखर अशा आदरणीय शरदचंद्र पवारसाहेब यांच्या पक्षाचे आपण सर्व कार्यकर्ते आहोत. साहेबांचा कार्यकर्ता हा सदैव लढणारा कार्यकर्ता आहे, रडणारा नाही. निवडणुकीत जे अपयश आले ते मागे सोडून आता पुढे जाऊयात.

आजही आपल्या पक्षातील एकही पदाधिकारी किंवा कार्यकर्ता जागेवरून हललेला नाही. हेच आपल्या पक्षाचे सर्वात मोठे यश आहे. पुन्हा एकदा महाराष्ट्र धर्म रक्षणाच्या लढाईसाठी आणि महाराष्ट्राच्या विकासासाठी सज्ज होऊयात. छत्रपती शिवाजी महाराज आणि फुले, शाहू आंबेडकर हा आपल्या पक्षाचा DNA आहे, हे आपण विसरता कामा नये. निवडणुकीतील लाट ही केवळ एकदाच येत असते म्हणूनच नव्या वर्षात एक नवीन सुरुवात करूयात.

येणाऱ्या स्थानिक स्वराज्य संस्थेच्या निवडणुकांसाठी आणि महाराष्ट्रातील नागरिकांवर होत असलेल्या अन्यायाविरोधात लढण्यासाठी आपल्याला सज्ज व्हायचे आहे. पुन्हा एकदा आपल्याला व आपल्या कुटुंबातील सर्वांना माझ्याकडून नवीन वर्षाच्या मनःपुर्वक शुभेच्छा, असे जयंत पाटील यांनी म्हटले आहे. आता जयंत पाटील यांचे हे पत्र व्हायरल होत आहे.