फडणवीस दिल्लीत, शिक्षणमंत्रीपदाची चर्चा! संजय राऊतांचा मोठा दावा

मुंबई (प्रतिनिधी) : नीट पेपरफुटी प्रकरणानंतर देशाच्या राजकारणात मोठी घडामोड घडल्याची चर्चा रंगली आहे. केंद्रीय शिक्षणमंत्री धर्मेंद्र प्रधान यांनी राजीनामा दिल्याची चर्चा सुरू असतानाच महाराष्ट्राचे मुख्यमंत्री देवेंद्र फडणवीस अचानक दिल्लीला रवाना झाले आहेत. या पार्श्वभूमीवर ठाकरे गटाचे खासदार संजय राऊत यांनी मोठा दावा केला आहे.

राऊत म्हणाले की, शिक्षणमंत्रीपद रिक्त झाल्यास देवेंद्र फडणवीस यांना केंद्रात मोठी जबाबदारी दिली जाऊ शकते. फडणवीस हे उच्चशिक्षित असून विविध विषयांवरील त्यांचा अभ्यास आणि अनुभव लक्षात घेता त्यांना दिल्लीत महत्त्वाची भूमिका मिळू शकते, अशी चर्चा सातत्याने होत असल्याचा दावा त्यांनी केला.

याचबरोबर, विद्यार्थ्यांच्या आंदोलनामुळे केंद्र सरकारवर मोठा दबाव निर्माण झाला असून त्यातूनच हा निर्णय घेतल्याचा आरोपही राऊत यांनी केला. तसेच, फडणवीस, एकनाथ शिंदे आणि सुनेत्रा पवार यांचे राजकीय निर्णय दिल्लीतील नेतृत्वाच्या सूचनेनुसारच होत असल्याची टीकाही त्यांनी केली.

देशभरात झालेल्या विद्यार्थी आंदोलनाचा उल्लेख करत राऊत यांनी आंदोलकांचे कौतुक केले. त्यांच्या मते, तरुणांच्या संघर्षामुळे सरकारला मोठा निर्णय घ्यावा लागला आणि लोकशाहीला नवी ऊर्जा मिळाली.

दरम्यान, मुंबईत होणाऱ्या उद्धव ठाकरे आणि राज ठाकरे यांच्या संयुक्त आंदोलनाच्या कार्यक्रमात कोणताही बदल नसल्याचेही त्यांनी स्पष्ट केले. आंदोलनाचे पुढील स्वरूप काय असेल, याची माहिती लवकरच दिली जाणार असल्याचे राऊत यांनी सांगितले.