विराट कोहली पुन्हा वनडेचा किंग! ICC क्रमवारीत अव्वल

Cricket News - भारतीय क्रिकेट चाहत्यांसाठी मोठी बातमी समोर आली आहे. आयसीसीने जाहीर केलेल्या ताज्या एकदिवसीय (ODI) क्रमवारीत विराट कोहलीने पुन्हा एकदा आपले वर्चस्व सिद्ध करत अव्वल स्थान पटकावले आहे. जवळपास पाच वर्षांनंतर विराट पुन्हा वनडे क्रिकेटचा नंबर 1 फलंदाज ठरला आहे. मात्र, या आनंदाच्या बातमीसोबतच न्यूझीलंडविरुद्धच्या दुसऱ्या एकदिवसीय सामन्यात त्याला मोठी खेळी करता न आल्याने चाहत्यांना थोडी निराशाही सहन करावी लागली.

गेल्या काही महिन्यांपासून सातत्यपूर्ण आणि दमदार कामगिरी करणाऱ्या विराट कोहलीला अखेर त्याच्या मेहनतीचे फळ मिळाले आहे. बुधवारी जाहीर झालेल्या आयसीसी रँकिंगमध्ये विराटने भारतीय कर्णधार रोहित शर्माला मागे टाकत पहिल्या स्थानावर झेप घेतली आहे. रोहित शर्मा तिसऱ्या क्रमांकावर घसरला असून विराटने पुन्हा एकदा आपणच वनडे क्रिकेटचा खरा ‘किंग’ असल्याचे सिद्ध केले आहे.

मात्र, रँकिंगमधील या यशासोबतच राजकोटमधून एक निराशाजनक बातमी समोर आली. न्यूझीलंडविरुद्धच्या दुसऱ्या वनडे सामन्यात विराट कोहलीकडून मोठ्या खेळीची अपेक्षा होती. पण तो केवळ 23 धावा करून बाद झाला. 29 चेंडू खेळलेल्या विराटला ख्रिस क्लार्कने बाद केले. विराट स्वस्तात माघारी परतल्याने भारतीय डावाला अपेक्षित गती मिळू शकली नाही.

विशेष म्हणजे, तब्बल 4 वर्षे 9 महिने आणि 1736 दिवसांच्या प्रतीक्षेनंतर विराट कोहली पुन्हा एकदा वनडे क्रिकेटमधील नंबर 1 फलंदाज ठरला आहे. 13 एप्रिल 2021 पर्यंत विराट अव्वल स्थानी होता, मात्र 14 एप्रिल 2021 रोजी पाकिस्तानचा बाबर आझम त्याच्या जागी पोहोचला होता. त्यानंतर आता दीर्घ कालावधीनंतर विराटने पुन्हा रँकिंगच्या शिखरावर मजल मारली आहे.

दक्षिण आफ्रिकेविरुद्धच्या मालिकेत विराटने 2 शतके आणि 1 अर्धशतक झळकावत आपला शानदार फॉर्म दाखवला. त्यानंतर न्यूझीलंडविरुद्ध पहिल्या वनडेत केलेली 93 धावांची दमदार खेळी त्याला पुन्हा नंबर 1 बनवण्यात निर्णायक ठरली.

आयसीसी वनडे फलंदाज क्रमवारी (टॉप खेळाडू) - 

विराट कोहली - 785 रेटिंग पॉइंट्स (पहिला क्रमांक)

डॅरेल मिचेल (न्यूझीलंड) -  784 पॉइंट्स (दुसरा क्रमांक)

रोहित शर्मा - 775 पॉइंट्स (तिसरा क्रमांक)

शुभमन गिल - पाचवा क्रमांक

श्रेयस अय्यर - दहावा क्रमांक