२९ महानगरपालिकांच्या महापौर पदाच्या आरक्षणाची सोडत जाहीर

मुंबई - राज्यातील महानगरपालिकांच्या महापौर पदाच्या आरक्षणाबाबतची प्रतीक्षा अखेर संपली आहे. २९ महानगरपालिकांच्या निवडणुकांचे निकाल जाहीर झाल्यानंतर आता सर्वांचे लक्ष ‘शहराचा प्रथम नागरिक’ असलेल्या महापौर पदाच्या आरक्षणाकडे लागले होते. मुख्यमंत्री देवेंद्र फडणवीस यांच्या दावोस दौऱ्यामुळे ही प्रक्रिया लांबण्याची शक्यता वर्तवली जात होती. मात्र, नगरविकास विभागाने अधिकृत पत्रक काढत महापौर पदाच्या आरक्षणाची सोडत जाहीर केली आहे. ही सोडत गुरुवारी, २२ जानेवारी २०२६ रोजी मुंबई येथे पार पडणार आहे.

नगरविकास विभागाने यासंदर्भातील अधिकृत आदेश जारी केले असून, सकाळी ११.०० वाजता मंत्रालय, मुंबई येथील सहाव्या मजल्यावरील ‘परिषद सभागृहात’ ही सोडत होणार आहे. या महत्त्वाच्या प्रक्रियेचे अध्यक्षपद माननीय राज्यमंत्री (नगरविकास) भूषवणार आहेत. राज्यातील सर्व २९ महानगरपालिकांच्या महापौर पदांचे भवितव्य या सोडतीवर अवलंबून असणार आहे. मुख्यमंत्र्यांच्या परदेश दौऱ्याच्या काळातच ही प्रशासकीय प्रक्रिया पार पडत असल्याने राजकीय हालचालींना वेग आला आहे. विशेषतः मुंबई महानगरपालिकेच्या महापौर पदाचे आरक्षण कोणत्या प्रवर्गासाठी जाहीर होणार आणि त्यानंतर महायुतीतील समीकरणे कशी बदलणार, याकडे संपूर्ण राज्याचे लक्ष लागले आहे.

गेल्या अनेक दिवसांपासून आरक्षण जाहीर न झाल्याने इच्छुक उमेदवारांमध्ये संभ्रमाचे वातावरण होते. मात्र, आता २२ जानेवारीची तारीख निश्चित झाल्यामुळे सर्वच पक्षांतील इच्छुकांनी मोर्चेबांधणी सुरू केली आहे. या सोडतीनंतरच राज्यातील जिल्हा परिषद आणि पंचायत समिती निवडणुकांचे बिगुल वाजण्याची दाट शक्यता वर्तवली जात आहे.