दिल्लीत विद्यार्थ्यांवर लाठीमार: २३ जुलैला 'महाराष्ट्र बंद'ची हाक; प्रकाश आंबेडकरांची घोषणा
mazamaharashtra 
मुंबई: दिल्लीतील जंतर-मंतरवर विविध मागण्यांसाठी आणि 'नीट' (NEET) परीक्षेतील घोळातून आंदोलन करणाऱ्या विद्यार्थ्यांवर झालेल्या पोलीस लाठीमाराचे पडसाद आता महाराष्ट्रात उमटू लागले आहेत. या घटनेच्या तीव्र निषेधार्थ वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी २३ जुलै रोजी 'महाराष्ट्र बंद'ची हाक दिली आहे. मुंबईतील पक्ष कार्यालयात आयोजित पत्रकार परिषदेत त्यांनी ही घोषणा केली.
'नीट' परीक्षेवर गंभीर प्रश्नचिन्ह
पत्रकार परिषदेत बोलताना ॲड. आंबेडकर यांनी नीट परीक्षेच्या पारदर्शकतेवर थेट बोट ठेवले. "पहिली परीक्षा चुकीच्या पद्धतीने झाली आणि फेरपरीक्षेतही अनेक त्रुटी समोर आल्या. हा प्रकार लाखो विद्यार्थ्यांच्या भवितव्याशी खेळणारा आहे," असा आरोप त्यांनी केला. केंद्र सरकारच्या या धोरणाविरोधात आता देशभरात व्यापक जनआंदोलन उभारण्याची गरज त्यांनी व्यक्त केली.
दडपशाहीविरोधात शांततापूर्ण बंदचे आवाहन
केंद्रातील भाजप सरकार आणि आरएसएसवर टीका करताना त्यांनी, "सत्ताधारी लोकशाहीपेक्षा दडपशाहीवर अधिक विश्वास ठेवतात," असा घणाघात केला. राज्यातील सर्व जिल्हास्तरीय संघटनांशी चर्चा करूनच २३ जुलैच्या बंदचा निर्णय घेण्यात आला आहे. भाजपविरोधी सर्व राजकीय पक्ष, सामाजिक संघटना आणि नागरिकांनी या बंदला पाठिंबा द्यावा, असे आवाहन त्यांनी केले. तसेच हा बंद पूर्णपणे शांततापूर्ण मार्गाने पाळला जाईल, असेही त्यांनी स्पष्ट केले.
