‘मराठे मोडतील पण वाकणार नाहीत!’ जंतर-मंतरवर अभिजित दिपकेंची गर्जना; ‘मला हिरो बनवू नका’

मुंबई (प्रतिनिधी) : केंद्रीय शिक्षणमंत्री धर्मेंद्र प्रधान यांच्या राजीनाम्याच्या चर्चेनंतर जंतर-मंतरवरील विद्यार्थी आंदोलनातील प्रमुख चेहरा अभिजित दिपके यांनी प्रतिक्रिया देताना स्वतःला कोणताही "हिरो" बनवू नका, असे स्पष्टपणे सांगितले.

दिपके म्हणाले, "एका व्यक्तीला संविधान, संस्था आणि मूळ मुद्द्यांपेक्षा मोठं बनवण्याची सवय देशासाठी घातक ठरते. त्यामुळे या आंदोलनाचं श्रेय एका व्यक्तीला न देता, ते विद्यार्थ्यांच्या सामूहिक संघर्षाला द्यायला हवं."

त्यांनी पुढे दावा केला की, या सरकारमध्ये मंत्री सहज राजीनामा देत नाहीत, पण विद्यार्थ्यांच्या संघर्षामुळे सरकारला निर्णय घ्यावा लागला. "सरकारसमोर न झुकता लढा दिला, तर मोठे निर्णयही घडवून आणता येतात," असेही ते म्हणाले.

मात्र, आंदोलन अद्याप संपलेले नसल्याचे सांगत दिपके यांनी दोन प्रमुख मागण्या पुन्हा मांडल्या. आंदोलनादरम्यान मृत्यू झालेल्या विद्यार्थ्यांच्या कुटुंबीयांना एक कोटी रुपयांची नुकसानभरपाई, तसेच विद्यार्थ्यांवर कारवाई केल्याचा आरोप असलेल्या संबंधित पोलिस अधिकाऱ्यांवर कठोर कारवाई व्हावी, अशी त्यांची मागणी आहे.

याशिवाय, आंदोलनात सहभागी विद्यार्थ्यांवर दाखल करण्यात आलेले सर्व गुन्हे तातडीने मागे घ्यावेत, अशीही त्यांनी मागणी केली. "ही लोकशाही आहे आणि विद्यार्थ्यांच्या न्यायासाठीचा लढा अजून संपलेला नाही," असा निर्धार व्यक्त करत त्यांनी आंदोलन पुढे सुरू ठेवण्याचा इशाराही दिला.