"राहुल गांधींना देशात अराजकता पसरवायची होती!"; 'नीट' पेपरफुटी आणि राजीनाम्यानंतर उपमुख्यमंत्री एकनाथ शिंदेंचा थेट हल्लाबोल!

मुंबई: "नीट (NEET) पेपरफुटी ही अत्यंत दुर्दैवी घटना आहे, मात्र या प्रकरणाचे गांभीर्य ओळखून केंद्र सरकारने तातडीने आणि योग्य पावले उचलली आहेत. या गुन्ह्यातून कोणाचीही सुटका होणार नाही, दोषींवर कडक कारवाई केली जाईल. पंतप्रधान नरेंद्र मोदी यांनी विद्यार्थ्यांच्या भावनांना व भवितव्याला प्राधान्य दिले," असे सांगत उपमुख्यमंत्री एकनाथ शिंदे यांनी पंतप्रधानांचे आभार मानले. तसेच नैतिक जबाबदारी स्वीकारून राजीनामा दिल्याबद्दल त्यांनी धर्मेंद्र प्रधान यांचे कौतुक केले.

'पंतप्रधानांच्या निवासस्थानी घातपात घडवण्याचा हेतू' - एकनाथ शिंदे

लोकसभेचे विरोधी पक्षनेते राहुल गांधी यांच्यावर कडाडून टीका करताना एकनाथ शिंदे म्हणाले, "विद्यार्थ्यांचे हे आंदोलन पूर्णपणे बिगरराजकीय होते. मात्र, काही राजकीय नेत्यांनी यामध्ये स्वतःच्या राजकीय पोळ्या भाजून घेतल्या. आंदोलन जंतर-मंतरवर सुरू असताना राहुल गांधी लोकांना पंतप्रधानांच्या निवासस्थानाकडे जाण्यासाठी चिथावणी देत होते. याचा अर्थ पंतप्रधानांच्या घरी घातपात घडवण्याचाच त्यांचा हेतू होता. देशात अराजकता माजवणे हाच विरोधी पक्षनेत्याचा मुख्य हेतू होता आणि मी याचा तीव्र निषेध करतो."

'महाराष्ट्राने नाकारलेले दिल्लीत जाऊन भडकवत होते'

उद्धव ठाकरे यांचे थेट नाव न घेता टोला लगावताना उपमुख्यमंत्री म्हणाले, "ज्यांना महाराष्ट्रातील जनतेने पूर्णपणे नाकारले आहे, ते नेते दिल्लीत जाऊन विद्यार्थ्यांना भडकावण्याचे काम करत होते. मात्र, आता विद्यार्थ्यांनी स्वतःहून आपले आंदोलन यशस्वीपणे मागे घेतल्यानंतर या नेत्यांची मोठी निराशा झाली आहे."

विद्यार्थ्यांनी अभ्यासावर लक्ष केंद्रित करावे

केंद्र आणि महायुती सरकार नेहमीच विद्यार्थ्यांच्या पाठीशी खंबीरपणे उभे असल्याचे सांगत एकनाथ शिंदे पुढे म्हणाले की, "विद्यार्थ्यांच्या सर्व प्रमुख मागण्या आता पूर्ण झाल्या आहेत. सरकारने पेपरफुटीविरोधात कठोर कायदा आणण्याचे स्पष्ट केले आहे. त्यामुळे विद्यार्थ्यांनी आता कोणत्याही राजकीय अफवांना बळी न पडता आपल्या अभ्यासावर लक्ष केंद्रित करून स्वतःचे उज्ज्वल भवितव्य घडवावे."