हल्द्वानीत शुद्धीकरणानंतर राहुल गांधींनी FIRची मागणी केली; आता त्यांच्याविरोधातच FIR दाखल, SC/ST कायद्यानुसार कलमे

मुंबई (प्रतिनिधी) : हल्द्वानीच्या रामलीला मैदानावर काँग्रेस अध्यक्ष मल्लिकार्जुन खरगे यांच्या सभेनंतर झालेल्या कथित ‘शुद्धीकरण’ वादाला आता नवं वळण मिळालं आहे. या प्रकरणी काँग्रेस नेते राहुल गांधी यांच्याविरोधातच एफआयआर दाखल करण्यात आला आहे.शुद्धीकरणाच्या कार्यक्रमात सहभागी झालेल्या अमित कुमार यांच्या तक्रारीवरून हल्द्वानी कोतवाली पोलिसांनी राहुल गांधी यांच्याविरोधात गुन्हा दाखल केला आहे. फौजदारी प्रक्रिया संहितेच्या (CrPC) कलम 196, 299 आणि अनुसूचित जाती/जमाती कायद्याच्या कलम 3 (1)(q) अंतर्गत राहुल गांधी यांच्याविरोधात एफआयआर क्रमांक 297/26 दाखल करण्यात आला आहे.

राहुल गांधी यांच्या वक्तव्यामुळे दलित समाजाच्या भावना दुखावल्याचा आरोप तक्रारदार अमित कुमार यांनी केला आहे. तसेच, आपल्या वक्तव्याद्वारे राहुल गांधी यांनी दलित समाजाचा आणि शुद्धीकरण कार्यक्रमात सहभागी झालेल्या व्यक्तींचा अपमान केल्याचा आरोपही तक्रारीत करण्यात आला आहे.

यापूर्वी अमित कुमार आणि विनोद कुमार आर्य यांनी हल्द्वानी कोतवालीमध्ये राहुल गांधी यांच्या विरोधात तक्रार दाखल केली होती. 8 ऑगस्ट रोजी मल्लिकार्जुन खरगे यांच्या सभेनंतर रामलीला मैदानावर कथित शुद्धीकरण विधी करण्यात आला होता.काँग्रेसचे राष्ट्रीय अध्यक्ष मल्लिकार्जुन खरगे यांनी 8 ऑगस्ट रोजी हल्द्वानीच्या रामलीला मैदानावर जाहीर सभा घेतली होती. या सभेनंतर भाजप नेते आणि कार्यकर्त्यांनी जमिनीवर गंगाजल शिंपडून शुद्धीकरण केल्याने वाद निर्माण झाला.

भाजपचे प्रदेशाध्यक्ष महेंद्र भट्ट यांच्यासह पक्षातील इतर नेत्यांनी या शुद्धीकरणाच्या मुद्द्यावर आपली भूमिका मांडली. दुसरीकडे, काँग्रेसने या प्रकाराला भाजपच्या मानसिकतेशी जोडत विरोध केला.राहुल गांधी यांनी या शुद्धीकरणाच्या विधीला दलित सन्मानाच्या मुद्द्याशी जोडून त्यावर प्रश्न उपस्थित केले होते. काँग्रेसने या प्रकरणी भाजप नेत्यांवर कारवाई करण्याची मागणी केली होती.

या संपूर्ण वादात काँग्रेसकडून पोलीस कारवाईची मागणी करण्यात आली होती. मल्लिकार्जुन खरगे हे दलित असल्यामुळे त्यांच्या सभेनंतर शुद्धीकरण विधी करण्यात आल्याचा आरोप काँग्रेसने केला होता.आता राहुल गांधी यांच्याविरोधातच एफआयआर दाखल झाल्याने हे प्रकरण दुहेरी कायदेशीर लढाईच्या दिशेने गेलं आहे. एकीकडे काँग्रेस कथित शुद्धीकरणाला दलितांच्या अपमानाशी जोडून कारवाईची मागणी करत आहे, तर दुसरीकडे शुद्धीकरणात सहभागी असलेल्या अमित कुमार यांनी राहुल गांधी यांच्याविरोधात गुन्हा दाखल केला आहे.

राहुल गांधी यांच्याविरोधात दाखल झालेल्या एफआयआरमुळे उत्तराखंडच्या राजकारणातील हा वाद आणखी चिघळण्याची शक्यता आहे. काँग्रेस हा मुद्दा दलित प्रतिष्ठा आणि सामाजिक भेदभावाशी जोडून मांडत आहे. त्यामुळे भाजप आणि काँग्रेसमधील आरोप-प्रत्यारोप आणखी तीव्र होण्याची शक्यता आहे.सामाजिक न्याय, दलित प्रतिष्ठा आणि धार्मिक भावनांशी संबंधित हा वाद आगामी विधानसभा निवडणुकांच्या पार्श्वभूमीवर मोठा राजकीय मुद्दा ठरण्याची शक्यता आहे.