धर्मेंद्र प्रधानांचा राजीनामा ही फक्त सुरुवात’; राहुल गांधींचा मोदी सरकारवर हल्लाबोल

मुंबई (प्रतिनिधी) : केंद्रीय शिक्षणमंत्री धर्मेंद्र प्रधान यांच्या राजीनाम्याच्या चर्चेनंतर लोकसभेतील विरोधी पक्षनेते राहुल गांधी यांनी विद्यार्थ्यांचे अभिनंदन करत केंद्र सरकारवर तीव्र टीका केली आहे.

राहुल गांधी यांनी म्हटले की, शिक्षणमंत्र्यांचा राजीनामा हा देशाची शिक्षणव्यवस्था पुन्हा उभी करण्याच्या दिशेने टाकलेले एक महत्त्वाचे पाऊल आहे. देशभरातील विद्यार्थ्यांनी लोकशाही, संविधान आणि आपल्या भविष्यासाठी दिलेल्या लढ्याचे त्यांनी कौतुक केले.

ते म्हणाले, "रस्त्यावर उतरून आपल्या हक्कांसाठी संघर्ष करणाऱ्या प्रत्येक विद्यार्थ्याचा आणि तरुणाचा मला अभिमान आहे. हा केवळ एका आंदोलनाचा विजय नसून अन्यायाविरोधात उभे राहणाऱ्या प्रत्येक नागरिकाचा विजय आहे."

राहुल गांधी यांनी पुढे स्पष्ट केले की, केवळ राजीनामा देऊन हा विषय संपणार नाही. आंदोलनादरम्यान विद्यार्थ्यांवर झालेल्या कथित कारवाईसाठी जबाबदार असलेल्या प्रत्येकावर कठोर कारवाई झाली पाहिजे. तसेच, ज्या विद्यार्थ्यांवर अन्याय झाला, त्यांच्याबाबत सरकारने स्पष्ट भूमिका घ्यावी, अशी मागणीही त्यांनी केली.

यासोबतच त्यांनी पंतप्रधान नरेंद्र मोदी यांनी विद्यार्थ्यांशी संवाद साधून त्यांच्या भावना समजून घ्याव्यात आणि घडलेल्या घटनांबाबत देशासमोर भूमिका स्पष्ट करावी, असेही म्हटले.