महाराष्ट्रात नर्सिंग शिक्षणाची १० नवीन सरकारी महाविद्यालये मंजूर; २३०० हून अधिक जागांची वाढ

मुंबई :  राज्यातील आरोग्य यंत्रणा अधिक बळकट करण्यासाठी आणि वैद्यकीय क्षेत्रात रोजगाराच्या नवीन संधी निर्माण करण्यासाठी महाराष्ट्र शासनाने एक ऐतिहासिक निर्णय घेतला आहे. राज्यात १० नवीन शासकीय बी.एस्सी. नर्सिंग महाविद्यालये सुरू करण्यास मंजुरी देण्यात आली असून, यामुळे नर्सिंगच्या तब्बल २,३०० हून अधिक जागा वाढणार आहेत. वैद्यकीय शिक्षण मंत्री हसन मुश्रीफ यांनी या क्रांतिकारी निर्णयाची माहिती दिली. या संपूर्ण प्रकल्पासाठी राज्य व केंद्र सरकारच्या माध्यमातून एकूण ५५८.७१ कोटी रुपयांच्या निधीला मंजुरी मिळाली आहे.

शासनाच्या या महत्त्वपूर्ण निर्णयामध्ये तीन मोठे बदल करण्यात आले आहेत:
१० नवीन महाविद्यालये: 
चंद्रपूर, सिंधुदुर्ग, यवतमाळ, अलिबाग (रायगड), रत्नागिरी, अमरावती, धाराशीव, गडचिरोली, पालघर आणि अहिल्यानगर या १० जिल्ह्यांमध्ये प्रत्येकी १०० जागांची नवीन शासकीय बी.एस्सी. नर्सिंग महाविद्यालये स्थापन केली जातील.

८ कॉलेजेसचे श्रेणीवर्धन: 
मुंबई (जी.टी. व सेंट जॉर्जेस रुग्णालय), धुळे, सोलापूर, अंबाजोगाई, अकोला, नागपूर आणि सांगली येथील आठ जी.एन.एम. पदविका शाळांचे रुपांतर प्रत्येकी १०० जागांच्या बी.एस्सी. नर्सिंग महाविद्यालयांत केले जाईल.

प्रवेश क्षमता दुप्पट:
मुंबई, नागपूर, छत्रपती संभाजीनगर, पुणे आणि नांदेड येथील सध्याच्या महाविद्यालयांची प्रवेश क्षमता ५० वरून थेट १०० करण्यात आली आहे.

जागतिक दर्जाच्या सुविधा आणि रोजगार निर्मिती
'इंडियन नर्सिंग कौन्सिल'च्या निकषांनुसार या सर्व महाविद्यालयांमध्ये आधुनिक प्रयोगशाळा, सुसज्ज ग्रंथालय आणि अत्याधुनिक वसतिगृहे उभारली जाणार आहेत. तसेच, प्रत्येक महाविद्यालयासाठी प्राचार्य, प्राध्यापकांपासून ते सुरक्षा रक्षकांपर्यंत वर्ग १ ते ४ मधील एकूण ८६० हून अधिक नवीन पदांच्या निर्मितीला मंजुरी देण्यात आली आहे. यामुळे राज्यातील आरोग्यसेवेचा चेहरामोहरा बदलण्यास मोठी मदत होणार आहे.