'राहुल गांधी पंतप्रधानपदावर दावा करू शकतात'; CPMच्या एम. ए. बेबींचं मोठं विधान, राजकीय चर्चेला उधाण

मुंबई (प्रतिनिधी) : सीपीएमचे सरचिटणीस एम. ए. बेबी यांनी लोकसभेतील विरोधी पक्षनेते राहुल गांधी यांच्या पंतप्रधानपदाच्या उमेदवारीबाबत महत्त्वाचं विधान केलं आहे. विरोधी पक्षनेते या नात्याने राहुल गांधी यांना पंतप्रधानपदावर दावा करण्याचा सर्वसाधारणपणे हक्क असल्याचं एम. ए. बेबी यांनी म्हटलं आहे. मात्र, विरोधी पक्षाकडून पंतप्रधान कोण होणार, याचा निर्णय निवडणुकीचा निकाल लागल्यानंतरच घेतला पाहिजे, असंही त्यांनी स्पष्ट केलं.

विरोधी पक्षाला बहुमत मिळालं तर पंतप्रधान कोण होणार, असा प्रश्न विचारण्यात आला असता एम. ए. बेबी म्हणाले की, याबाबत निवडणुकीनंतर चर्चा झाली पाहिजे. साहजिकच, विरोधी पक्षनेत्याला पंतप्रधानपदावर दावा करण्याचा सर्वसाधारणपणे अधिकार असतो. मात्र, राहुल गांधी यांना विरोधी पक्षाचा पंतप्रधानपदाचा उमेदवार म्हणून थेट घोषित करणं किंवा त्यांच्या उमेदवारीला औपचारिक पाठिंबा देणं एम. ए. बेबी यांनी टाळलं आहे.

 काल्पनिक परिस्थिती निर्माण करून आत्ताच या विषयावर चर्चा करण्यात काही अर्थ नाही, असं त्यांनी म्हटलं. यावेळी त्यांनी माजी मुख्यमंत्री आणि डाव्या विचारसरणीचे ज्येष्ठ नेते ज्योती बसू यांचं उदाहरणही दिलं. पूर्वी अशीच परिस्थिती निर्माण झाली होती, जेव्हा सीपीएमच्या केंद्रीय समितीसमोर पक्षाच्या सदस्याला पंतप्रधानपदी पाठवायचं की नाही, यावर चर्चा झाली होती. त्यावेळी ज्योती बसू यांचं नाव सर्वप्रथम समोर आलं होतं.

 सीपीएमच्या सध्याच्या संसदीय संख्याबळाचा उल्लेख करत एम. ए. बेबी यांनी स्पष्ट केलं की, त्यांचा पक्ष स्वतः पंतप्रधानपदासाठी दावा करणार नाही. सध्याचं संख्याबळ पाहता सीपीएमने असा दावा करणं हास्यास्पद ठरेल, असं त्यांनी म्हटलं. विरोधी पक्षाला अपेक्षित बहुमत मिळालं, तर विरोधी पक्षातील नेते आपापसात चर्चा करून पंतप्रधानपदाचा उमेदवार ठरवण्याइतके परिपक्व आहेत. त्यामुळे आताच या मुद्द्यावर चर्चा करणं घाईचं ठरेल, असंही एम. ए. बेबी यांनी सांगितलं.

 दरम्यान, तमिळनाडूमध्ये अभिनेते-राजकारणी विजय यांच्या संभाव्य पंतप्रधानपदाच्या उमेदवारीबाबत सुरू असलेल्या चर्चेचाही एम. ए. बेबी यांनी उल्लेख केला. भाजपच्या पराभवानंतर भविष्यातील पंतप्रधानपदासाठी संभाव्य उमेदवार म्हणून जोसेफ विजय यांच्या नावाचीही चर्चा होत असल्याचं त्यांनी सांगितलं. मात्र, ही वेगळी चर्चा असून सध्या त्यावर भाष्य करायचं नसल्याचं त्यांनी स्पष्ट केलं.

 त्यामुळे एम. ए. बेबी यांनी राहुल गांधींची संभाव्य पंतप्रधानपदाची उमेदवारी नाकारलेली नाही. मात्र, सीपीएम सध्या कोणत्याही व्यक्तीला पंतप्रधानपदाचा उमेदवार म्हणून जाहीर करण्याच्या भूमिकेत नाही. विरोधी पक्षाला बहुमत मिळाल्यास निवडणुकीनंतर मित्रपक्षांच्या नेत्यांमध्ये चर्चा करून पंतप्रधानपदासाठी नाव निश्चित केलं जावं, अशी भूमिका एम. ए. बेबी यांनी मांडली आहे.