अभिनेत्री उर्मिला कोठारेंच्या कारचा अपघात

मुंबई: लोकप्रिय मराठी अभिनेत्री उर्मिला कोठारेच्या कारने दोन मजुरांना धडक दिली. यामध्ये एका मजुराचा जागीच मृत्यू  झाला तर एक मजूर गंभीर जखमी झाला आहे. अपघातात उर्मिला देखील जखमी झाली आहे. मुंबईतील कांदिवली परिसरातील पोईसर मेट्रो स्टेशनजवळ हा अपघात झाला. 

 कांदिवली परिसरातील पोईसर मेट्रो स्टेशनजवळ रस्त्यावर मेट्रो कामगार काम करत असताना उर्मिलाच्या कारनं त्यांना जोरदार धडक दिली. यात एका मेट्रो मजुराचा जागीच मृत्यू झाला असून, दुसरा मजूर गंभीर जखमी आहे. शूटिंगवरून परत येत असताना हा अपघात घडला. उर्मिलाचा ड्रायव्हर कार चालवत होता. ड्रायव्हरचे गाडीवरचे नियंत्रण सुटल्याने हा अपघात झाल्याची प्राथमिक माहिती आहे. पोलिसांनी उर्मिलाच्या ड्रायव्हर विरोधात गुन्हा दाखल केला असून पोलिस पुढील तपास करत आहेत. कारमधील एअर बॅग वेळेत उघड्यानं उर्मिलाचा जीव वाचल्याचंही पोलिसांनी म्हटलं आहे. हा अपघात इतका भीषण होता की, तिच्या कारचा चक्काचुर झाला आहे.