‘दृश्यम 3’ची बॉक्स ऑफिसवर धडाकेबाज एन्ट्री; 48 तासांत 6 चित्रपटांना मागे टाकत रेकॉर्डब्रेक कमाई

मुंबई (प्रतिनिधी) : मोहनलालचा बहुप्रतिक्षित ‘दृश्यम 3’ सिनेमा रिलीज होताच बॉक्स ऑफिसवर अक्षरशः वादळ घेऊन आला आहे. सस्पेन्स, थ्रिल आणि जबरदस्त कथानकामुळे प्रेक्षकांनी चित्रपटाला डोक्यावर घेतलं आहे. अवघ्या 48 तासांतच या सिनेमाने विक्रमी कमाई करत अनेक मोठ्या मल्याळम सिनेमांना मागे टाकलं आहे. 

जीतू जोसेफ दिग्दर्शित ‘दृश्यम 3’ची रिलीजपूर्वीपासूनच मोठी चर्चा होती. अॅडव्हान्स बुकिंगमध्येही सिनेमाने दमदार कामगिरी केली होती. पहिल्याच दिवशी चित्रपटाने 15.85 कोटी रुपयांची कमाई करत शानदार ओपनिंग घेतली. दुसऱ्या दिवशी कमाईत थोडी घट झाली असली, तरी चित्रपटाने 11.05 कोटींचं नेट कलेक्शन केलं. सॅकनिल्कच्या रिपोर्टनुसार, दोन दिवसांत ‘दृश्यम 3’चं भारतातील नेट कलेक्शन 26.90 कोटींवर पोहोचलं आहे, तर ग्रॉस कलेक्शन 31.18 कोटी रुपये झालं आहे.

भारतात कमाईत किंचित घसरण झाली असली, तरी परदेशात मात्र मोहनलालच्या सिनेमाचा दबदबा कायम आहे. रिपोर्टनुसार, दुसऱ्याच दिवशी चित्रपटाने विदेशात जवळपास 20 कोटी रुपयांची कमाई केली. त्यामुळे ‘दृश्यम 3’ची एकूण ओव्हरसीज कमाई 45 कोटींवर पोहोचली आहे. याचबरोबर चित्रपटाचं वर्ल्डवाइड कलेक्शन अवघ्या दोन दिवसांत 76.18 कोटी रुपयांवर गेलं आहे.

‘दृश्यम 3’ने जगभरातील सर्वाधिक कमाई करणाऱ्या मल्याळम चित्रपटांच्या यादीत मोठी झेप घेतली आहे. अवघ्या 48 तासांतच या चित्रपटाने सहा सिनेमांना मागे टाकत चौथ्या क्रमांकावर झेप घेतली आहे. सध्या 2026 मधील सर्वाधिक कमाई करणाऱ्या मल्याळम चित्रपटांच्या यादीत ‘वाझा 2’, ‘आडू 3’ आणि ‘पैट्रियट’ या चित्रपटांनंतर ‘दृश्यम 3’ने स्थान मिळवलं आहे.