मुंबईत रेड अलर्ट, तुफान पाऊस तरीही शिवसैनिकांची तोबा गर्दी; रामरक्षा आंदोलनात उद्धव ठाकरेंची तोफ कडाडली!

मुंबई: मुंबई आणि उपनगरांमध्ये मुसळधार पावसाचा 'रेड अलर्ट' असूनही, शिवसेना (उद्धव बाळासाहेब ठाकरे) पक्षाच्या वतीने दादर परिसरात पुकारलेल्या 'रामरक्षा' आंदोलनाला शिवसैनिकांनी प्रचंड गर्दी केली. अयोध्येतील राम मंदिरात झालेल्या कथित आर्थिक गैरव्यवहाराविरोधात पक्षप्रमुख उद्धव ठाकरे यांनी सत्ताधारी भाजप आणि महायुती सरकारवर कडक शब्दांत प्रहार केला. "तुम्ही गाफील राहावे यासाठी प्रयत्न केला जातोय, आता समस्त हिंदूंनी जागे होण्याची गरज आहे," अशी आर्त साद ठाकरेंनी यावेळी दिली.

उद्धव ठाकरे यांनी अयोध्येतील राम मंदिरातील कथित चोऱ्या आणि गैरव्यवहाराचा निषेध करण्यासाठी ५ जुलै रोजी या आंदोलनाची हाक दिली होती. मुंबईत कोसळणाऱ्या मुसळधार पावसामुळे प्रशासनाने नागरिकांना गरज नसेल तर घराबाहेर न पडण्याचे आवाहन केले होते. मात्र, या प्रतिकूल हवामानातही शेकडो शिवसैनिकांनी छत्र्या आणि रेनकोट घालून, डोक्यावर भगव्या टोप्या आणि गळ्यात भगवे गमछे परिधान करून दादर परिसर भगवामय केला होता.

या आंदोलनात स्वतः उद्धव ठाकरे, आमदार आदित्य ठाकरे, नेते सुभाष देसाई, माजी महापौर किशोरी पेडणेकर आणि खासदार अरविंद सावंत यांच्यासह प्रमुख पदाधिकारी उपस्थित होते. सुरुवातीला भर पावसात रामरक्षा आणि मारुतीची महाआरती करण्यात आली. त्यानंतर स्वतः चिंब भिजत उद्धव ठाकरे यांनी उपस्थितांना संबोधित केले. "अयोध्येतील प्रभू श्रीरामाच्या मंदिरात ज्यांनी गैरव्यवहार आणि पाप केले आहे, त्या दोषींना कठोर शिक्षा झालीच पाहिजे," अशी आग्रही मागणी करत त्यांनी सत्ताधाऱ्यांच्या हिंदुत्वावर सडकून टीका केली. पक्षात फूट पडल्यानंतरही ठाकरेंच्या एका हाकेवर भर पावसात जमलेल्या या अथांग गर्दीमुळे राजकीय वर्तुळात मोठी चर्चा रंगली आहे.