शिल्पा शिंदेच्या वक्तव्यावरून वाद; हिना खानची तीव्र प्रतिक्रिया

मुंबई (प्रतिनिधी) : 'अंगुरी भाभी' या भूमिकेमुळे प्रसिद्ध झालेल्या अभिनेत्री शिल्पा शिंदे हिने अलीकडे एका पॉडकास्टमध्ये केलेल्या वक्तव्यामुळे नव्या वादाला तोंड फुटले आहे. 'भाबीजी घर पर हैं' मालिकेशी संबंधित एका जुन्या प्रकरणाचा उल्लेख करताना तिने पूर्वी केलेले काही आरोप खरे नव्हते, असे सांगितल्याचे वृत्त समोर आले आहे.या वक्तव्यानंतर सोशल मीडियावर विविध प्रतिक्रिया उमटत असून अनेकांनी नाराजी व्यक्त केली आहे. दरम्यान, अभिनेत्री हिना खान हिनेही याबाबत आपले मत मांडले आहे.

हिना खानने इन्स्टाग्रामवर एक सविस्तर पोस्ट शेअर करत शिल्पा शिंदेच्या वक्तव्यावर टीका केली. संवेदनशील विषयांवर बोलताना जबाबदारीची जाणीव असणे आवश्यक असल्याचे तिने म्हटले. वैयक्तिक मतभेद किंवा वाद मिटवण्यासाठी गंभीर आरोपांचा वापर करणे चुकीचे असल्याचेही तिने नमूद केले.तिने आपल्या पोस्टमध्ये संबंधित प्रकरणातील निर्माता संजय कोहली यांचाही उल्लेख केला. अशा आरोपांमुळे एखाद्या व्यक्तीची आणि त्यांच्या कुटुंबाची प्रतिमा प्रभावित होऊ शकते, असे हिनाने म्हटले आहे.

हिना खानने पुढे असेही सांगितले की, जर एखादी व्यक्ती स्वतःच पूर्वीचे आरोप निराधार असल्याचे मान्य करत असेल, तर त्याचे गंभीर परिणाम समाजावर आणि खऱ्या पीडितांच्या विश्वासार्हतेवर होऊ शकतात. या संपूर्ण घडामोडीबद्दल तिने आश्चर्य आणि चिंता व्यक्त केली आहे.सध्या या प्रकरणावर सोशल मीडियावर मोठ्या प्रमाणात चर्चा सुरू असून, संबंधित वक्तव्यांवर विविध स्तरांतून प्रतिक्रिया उमटत आहेत.