जैन मुनी आणि पांढऱ्या पट्ट्यांच्या वादावर राज ठाकरेंची प्रतिक्रिया

मुंबई (प्रतिनिधी) : मुंबईसह राज्यातील अनेक भागांत रस्त्यांवर काढल्या जाणाऱ्या पांढऱ्या पट्ट्यांवरून सुरू झालेला वाद आता अधिकच चर्चेत आला आहे. जैन साधू-संतांच्या मार्गावर पांढऱ्या पट्ट्या काढण्याच्या प्रथेवर मनसेने आक्षेप घेतल्यानंतर या मुद्द्यावर विविध प्रतिक्रिया उमटत आहेत.

याच पार्श्वभूमीवर महाराष्ट्र नवनिर्माण सेनेच्या मेळाव्यात बोलताना मनसे अध्यक्ष राज ठाकरे यांनी या विषयावर भाष्य केले. जैन समाजाबद्दल आदर व्यक्त करताना त्यांनी काही व्यक्ती धार्मिक विषयांमध्ये राजकारण आणण्याचा प्रयत्न करत असल्याचा आरोप केला.

राज ठाकरे म्हणाले, "आम्हाला कोणत्याही धर्माशी वाद नाही. प्रत्येक धर्माचा आणि त्यांच्या परंपरांचा आम्ही आदर करतो. मात्र अनावश्यक वाद निर्माण करून समाजात तणाव निर्माण करण्याचा प्रयत्न झाला तर आम्ही शांत बसणार नाही."पांढऱ्या पट्ट्यांच्या मुद्द्यावर बोलताना त्यांनी प्रश्न उपस्थित केला की, "अनेक जैन मुनी देशभर प्रवास करतात, विविध रस्त्यांवरून चालतात. मग अशा पांढऱ्या पट्ट्यांची गरज अचानक का भासू लागली? धर्माचं काम करा, पण समाजात अनावश्यक वाद निर्माण होणार नाही याची काळजी घ्या."

राज ठाकरे यांनी पुढे सांगितले की, या विषयावर जैन समाजातील काही प्रतिनिधी त्यांची भेट घेणार असून त्यांच्याशी सविस्तर चर्चा केली जाईल. तसेच संपूर्ण जैन समाजाला या वादासाठी जबाबदार धरता येणार नाही, असेही त्यांनी स्पष्ट केले.दरम्यान, पांढऱ्या पट्ट्यांच्या मुद्द्यावरून राज्यात राजकीय आणि सामाजिक स्तरावर चर्चा सुरू असून विविध संघटना आणि नेत्यांकडून प्रतिक्रिया व्यक्त केल्या जात आहेत.