व्हीप झुगारून 6 खासदार गैरहजर; ठाकरे गटाच्या अडचणी वाढणार? उज्ज्वल निकम यांनी उपस्थित केले 3 महत्त्वाचे प्रश्न

मुंबई (प्रतिनिधी) : शिवसेना (उद्धव बाळासाहेब ठाकरे) पक्षाच्या संसदीय बैठकीला जारी करण्यात आलेल्या व्हीपनंतरही लोकसभेतील 9 पैकी 6 खासदार अनुपस्थित राहिल्याने राज्याच्या राजकारणात मोठी चर्चा रंगली आहे. या घडामोडीनंतर ठाकरे गटाकडून संबंधित खासदारांविरोधात कारवाईची मागणी होण्याची शक्यता व्यक्त केली जात आहे. या पार्श्वभूमीवर ज्येष्ठ विधिज्ञ उज्ज्वल निकम यांनी कायदेशीर बाजू स्पष्ट करत काही महत्त्वाचे मुद्दे मांडले आहेत.

निकम यांच्या मते, संबंधित सहा खासदारांनी नेमकी कोणती भूमिका घेतली आहे, हे अद्याप स्पष्ट झालेले नाही. त्यांनी पक्षाचा राजीनामा दिला आहे का, दुसऱ्या पक्षात प्रवेश केला आहे का, किंवा स्वतंत्र गट स्थापन करण्याचा प्रयत्न सुरू आहे का, याबाबत अधिकृत माहिती समोर आलेली नाही.दहाव्या परिशिष्टातील तरतुदींनुसार, पक्षाच्या व्हीपचे उल्लंघन केल्यास अपात्रतेचा प्रश्न निर्माण होऊ शकतो. मात्र, जर दोन तृतीयांशपेक्षा अधिक सदस्यांनी एकत्रितपणे वेगळी भूमिका घेतली किंवा दुसऱ्या पक्षात जाण्याचा निर्णय घेतला, तर परिस्थिती वेगळी असू शकते.

निकम यांनी या प्रकरणात तीन महत्त्वाचे प्रश्न उपस्थित केले आहेत. पहिला, या सहा खासदारांनी स्वतंत्र नेता निवडला आहे का? दुसरा, ते व्हीप जारी होण्यापूर्वीच दुसऱ्या राजकीय गटात किंवा पक्षात सहभागी झाले आहेत का? आणि तिसरा, त्यांनी लोकसभा अध्यक्षांकडे नेमकी कोणती मागणी केली आहे?

त्यांच्या मते, या तिन्ही प्रश्नांची स्पष्ट उत्तरे मिळाल्यानंतरच या प्रकरणावर ठोस कायदेशीर भाष्य करता येईल. तसेच लोकसभा अध्यक्षांची भूमिका आणि संबंधित खासदारांनी उचललेली पुढील पावले यावरच या वादाचा पुढील मार्ग अवलंबून असेल.

दरम्यान, पक्षाने जारी केलेला व्हीप हा कायदेशीरदृष्ट्या महत्त्वाचा आणि बंधनकारक असतो. मात्र, या सहा खासदारांनी कोणती राजकीय आणि कायदेशीर रणनीती आखली आहे, हे पुढील काही दिवसांत स्पष्ट होणार असल्याचेही निकम यांनी नमूद केले.