ग्रामपंचायतींसाठी ‘पंचम’ व्हॉट्सअॅप चॅटबॉट लाँच ; पंचम म्हणजे नेमकं काय..?

नवी दिल्ली - गावपातळीवरील प्रशासकीय कामकाज अधिक सोपे, जलद आणि पारदर्शक करण्याच्या उद्देशाने केंद्रीय पंचायती राज मंत्रालयाने ‘पंचम’ (Panchayat Assistance & Messaging Chatbot) हा विशेष व्हॉट्सअॅप चॅटबॉट लाँच केला आहे. या माध्यमातून आता नागरिकांना घरबसल्या मोबाईलवरून ग्रामपंचायतीशी संबंधित कामे, योजना आणि विविध सेवांची माहिती मिळू शकणार आहे. ग्रामपंचायतींना सक्षम करण्यासाठी ‘डिजिटल सोबती’ म्हणून ‘पंचम’ची रचना करण्यात आली आहे. दैनंदिन प्रशासकीय कामांमध्ये मदत करण्याबरोबरच मार्गदर्शन आणि महत्त्वाची माहिती सहज उपलब्ध करून देणे हा या चॅटबॉटचा मुख्य उद्देश आहे. यामुळे केंद्र सरकार आणि देशभरातील ३० लाखांहून अधिक निवडून आलेले प्रतिनिधी व पंचायत पदाधिकारी यांच्यात थेट डिजिटल संवाद साधला जाणार आहे.

ग्रामीण भागात व्हॉट्सअॅपचा मोठ्या प्रमाणावर वापर होत असल्याने ही सेवा खास व्हॉट्सअॅपवर उपलब्ध करून देण्यात आली आहे. यासाठी कोणतेही नवीन अॅप डाऊनलोड करण्याची किंवा विशेष प्रशिक्षण घेण्याची गरज नाही. साध्या चॅटप्रमाणेच नागरिकांना आवश्यक माहिती मिळू शकणार आहे.

‘पंचम’ हा चॅटबॉट ई-ग्राम स्वराजशी संबंधित लाइव्ह डेटा तसेच पंचायत अधिकारी आणि निवडून आलेल्या सदस्यांच्या मोबाईल क्रमांकांचा वापर करतो. ई - ग्राम स्वराज, एलजीडी, जीपीडीपी आणि मंत्रालयाच्या प्रमुख योजना व उपक्रमांबाबतची माहिती तो उपलब्ध करून देईल. सध्या हा चॅटबॉट आधीच फीड केलेल्या निश्चित माहितीनुसार उत्तरे देतो, मात्र ही माहिती नियमितपणे अपडेट केली जाणार आहे.

या चॅटबॉटच्या माध्यमातून सामान्य नागरिकांना विविध दाखले, प्रमाणपत्रे, सरकारी योजना आणि महत्त्वाच्या शासकीय कामांबाबत माहिती मिळेल. तसेच ग्रामपंचायत सदस्य आणि अधिकाऱ्यांना योजना, सर्वेक्षणे, प्रशिक्षण साहित्य आणि मंत्रालयाच्या अधिकृत सूचना थेट उपलब्ध होतील.