दिल्लीतील रेस्तरॉंला आग, 21 मृत्यू; 40 जणांची सुटका, जीव वाचवण्यासाठी बिल्डिंगवरून उड्या

दिल्ली (प्रतिनिधी) : दिल्लीतील मालवीय नगरमध्ये बुधवारी सकाळी फ्लरिश स्टे नावाच्या हॉटेलला आग लागल्याने 21 लोकांचा मृत्यू झाला. मृतांमध्ये बहुतेक परदेशी नागरिक आहेत. जे मध्य आशिया आणि आफ्रिकन देशांतील आहेत. किती परदेशी नागरिक मरण पावले आहेत, याची नेमकी माहिती सध्या समोर आलेली नाही.

दिल्ली अग्निशमन सेवा आणि स्थानिक लोकांच्या मते, मालवीय नगरमधील या हॉटेलच्या रेस्तरॉंमध्ये सकाळी 8.50 वाजता आग लागली. आग वरच्या मजल्यांवरील हॉटेलच्या खोल्या आणि तळघरापर्यंत पोहोचली.घटनेमध्ये काही लोक जीव वाचवण्यासाठी जळत्या इमारतीच्या तिसऱ्या-चौथ्या मजल्यावरून उड्या मारताना दिसत आहेत. त्यांना वाचवण्यासाठी स्थानिक लोकांनी जमिनीवर गाद्याही अंथरल्या होत्या.

एकूण 40 लोकांना वाचवण्यात आले. अनेकांची प्रकृती गंभीर आहे. तसेच, तळघरातूनही 6 पेक्षा जास्त लोकांना बाहेर काढण्यात आले. दिल्लीतील या हॉटेलला आग लागण्याचे कारण अद्याप समजू शकलेले नाही. गेल्या 6 महिन्यांत दिल्लीत आगीच्या वेगवेगळ्या घटनांमध्ये 66 लोकांचा मृत्यू झाला आहे.

आग 6 मजली इमारतीच्या तळमजल्यावर असलेल्या बी-एन-बी रेस्तरॉंमध्ये लागली. थोड्या वेळाने ती हॉटेलमध्ये वरच्या दिशेने पसरली. हे हॉटेल दिल्लीतील प्रेस एन्क्लेव्ह रोडवर आहे. येथेच मॅक्स हॉस्पिटल आणि एम्स देखील आहे. असे सांगितले जात आहे की या रुग्णालयांमध्ये उपचार घेण्यासाठी येणाऱ्या रुग्णांचे नातेवाईकही या हॉटेलमध्ये थांबत असत.

फ्लरिस स्टे गेस्टहाऊसला बेड अँड ब्रेकफास्ट संकल्पनेअंतर्गत परवाना जारी करण्यात आला होता. या अंतर्गत 6 खोल्यांची परवानगी होती, परंतु 25 खोल्या बांधल्या होत्या.आग लागल्यानंतर हॉटेलच्या रेस्टॉरंटच्या तळघरातही अनेक लोक अडकले होते. आत जाण्याचा आणि बाहेर पडण्याचा एकच मार्ग होता, जो खूप अरुंद होता.हॉटेलकडे फायर NOC नव्हती. येण्या-जाण्याचा एकच मार्ग होता.