प्रशांत किशोरांच्या प्रदेशाध्यक्ष बदलाच्या सल्ल्याची चर्चा; सुनेत्रा पवारांसोबतच्या बैठकीत नेमकं काय घडलं?

मुंबई (प्रतिनिधी) : एका भेटीमुळे राष्ट्रवादी काँग्रेसमधील गटातटाचं राजकारण पुन्हा एकदा चर्चेत आलं आहे. बिहारमधील नवनिर्वाचित आमदार आणि राजकीय रणनीतीकार प्रशांत किशोर यांनी काल उपमुख्यमंत्री सुनेत्रा पवार यांची भेट घेतली. या भेटीत त्यांनी राष्ट्रवादीचे प्रदेशाध्यक्ष सुनील तटकरे यांच्या कार्यपद्धतीबाबत नाराजी व्यक्त केल्याची माहिती समोर आली आहे. आपल्याकडून पक्षासाठी काम करून घ्यायचं असेल, तर प्रदेशाध्यक्षपदाबाबत निर्णय घ्यावा लागेल, अशी ठाम भूमिका प्रशांत किशोर यांनी सुनेत्रा पवार यांच्यासमोर मांडल्याचीही चर्चा आहे.

या भेटीनंतर तटकरेंवरून राष्ट्रवादीत यापूर्वी झालेल्या वादाची पुन्हा चर्चा सुरू झाली. प्रकरण चर्चेत आल्यानंतर सुनील तटकरे स्वतः समोर आले आणि प्रशांत किशोर राष्ट्रवादीचे सल्लागार आहेत, याचीच आपल्याला माहिती नसल्याचं त्यांनी स्पष्ट केलं. या बैठकीला पार्थ पवार प्रत्यक्ष उपस्थित होते. तर जय पवार ऑनलाइन सहभागी झाल्याची चर्चा त्यांनी फेटाळून लावली.

सूत्रांच्या माहितीनुसार, बैठकीत प्रशांत किशोर यांनी राष्ट्रवादीच्या महाराष्ट्र प्रदेशाध्यक्षांच्या कार्यपद्धतीबाबत नाराजी व्यक्त केली. जोपर्यंत राज्यातील नेतृत्वासोबत योग्य समन्वयाने काम करता येत नाही, तोपर्यंत महाराष्ट्रात काम करणं कठीण असल्याचं त्यांनी सुनेत्रा पवार यांना सांगितल्याची माहिती आहे.

यापूर्वी सुनेत्रा पवार आणि पार्थ पवार यांनी तीन वेळा प्रशांत किशोर यांची भेट घेतली होती. त्या वेळी त्यांनी राष्ट्रवादी काँग्रेसच्या पक्षसंघटनेत काही बदल सुचवले होते. मात्र, मागील तीन बैठकांमध्ये सुचवलेल्या गोष्टींची अंमलबजावणी होत नसेल, तर काम करणं कठीण असल्याचं प्रशांत किशोर यांनी स्पष्ट केल्याची माहिती आहे. भविष्यातील निवडणुकांसाठी आपल्याकडून काम करून घ्यायचं असेल, तर प्रदेशाध्यक्षपदाबाबत निर्णय घ्यावा लागेल, अशी ठाम भूमिका त्यांनी बैठकीत घेतल्याचं सूत्रांचं म्हणणं आहे.

या बैठकीला राष्ट्रवादी काँग्रेसच्या राष्ट्रीय अध्यक्षा सुनेत्रा पवार, पार्थ पवार आणि प्रशांत किशोर यांच्या टीममधील दोन सदस्य उपस्थित होते. जय पवारदेखील बैठकीत ऑनलाइन सहभागी झाल्याची माहिती सूत्रांनी दिली आहे.

दरम्यान, प्रशांत किशोर आणि सुनेत्रा पवार यांची भेट झाल्याची माहिती मिळाली असून, ती औपचारिक भेट होती, असं सुनील तटकरे यांनी म्हटलं आहे. या भेटीत नेमकी काय चर्चा झाली, याबाबत आपल्याला माहिती नसल्याचंही त्यांनी स्पष्ट केलं. आम्ही प्रॅक्टिकल आहोत, असं सांगत तटकरे यांनी प्रशांत किशोर यांच्या नियुक्तीबाबतही प्रश्न उपस्थित केले.

पवार साहेब, अजितदादा आणि इतर नेत्यांसोबत आपण काम केलं असून, आपल्या राजकीय कामासाठी कोणत्याही रणनीतीकार किंवा सर्व्हेची गरज नसल्याचं तटकरे यांनी म्हटलं. आपण फिल्डमध्ये काम करणारे आहोत आणि गावागावातील लोक, तरुणाई यांच्याशी संवाद साधल्यानंतर परिस्थितीचा अंदाज येतो, असंही त्यांनी सांगितलं.

प्रशांत किशोर यांनी असा कोणताही सल्ला दिलेला नाही, असं राष्ट्रवादीचे नेते आणि कृषी मंत्री दत्ता भरणे यांनी स्पष्ट केलं. तर छगन भुजबळ यांनी या विषयावर सावध प्रतिक्रिया दिली आहे. राष्ट्रवादीचे नेते आणि अन्न व औषध प्रशासन मंत्री नरहरी झिरवाळ यांनीही प्रशांत किशोर यांनी केलेल्या कथित सूचनांवर बोलणं टाळलं.

हा राष्ट्रवादीचा अंतर्गत विषय असल्याचं सांगत काँग्रेसचे प्रदेशाध्यक्ष नाना पटोले यांनीही यावर भाष्य करणं टाळलं. तर राष्ट्रवादीने प्रशांत किशोर यांची सल्लागार म्हणून नेमणूक केली आहे की नाही, याबाबतही स्पष्टता झालेली नाही. त्यामुळे राष्ट्रवादीच्या नेत्यांशी चर्चा करूनच याबाबत बोलेन, अशी प्रतिक्रिया मुख्यमंत्री देवेंद्र फडणवीस यांनी दिली आहे.