सोनम वांगचुक प्रकरणावरून उद्धव ठाकरेंचा केंद्र सरकारवर निशाणा; धर्मेंद्र प्रधानांच्या राजीनाम्याची मागणी

मुंबई (प्रतिनिधी) : नागपुरात माध्यमांशी संवाद साधताना शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी सोनम वांगचुक यांच्या आंदोलनाच्या पार्श्वभूमीवर केंद्र सरकारवर जोरदार टीका केली.

ठाकरे म्हणाले की, परीक्षांतील गैरव्यवहार आणि पेपरफुटीच्या घटनांमुळे अनेक विद्यार्थ्यांनी टोकाचे पाऊल उचलले आहे. अशा परिस्थितीत शिक्षणमंत्री धर्मेंद्र प्रधान यांच्या जबाबदारीबाबत सरकारने भूमिका स्पष्ट करावी आणि त्यांच्या राजीनाम्याचा विचार करावा, अशी मागणी त्यांनी केली.

सोनम वांगचुक यांना जंतर-मंतरवरून रुग्णालयात हलवण्याच्या कारवाईवरही त्यांनी प्रश्न उपस्थित केले. उच्च न्यायालयाने नियमित वैद्यकीय तपासणीचे निर्देश दिले होते, मात्र त्यांना जबरदस्तीने हलवण्याचे आदेश दिले नव्हते. तसे आदेश असतील तर ते सार्वजनिक करावेत, असेही ठाकरे म्हणाले.

त्यांनी पुढे सांगितले की, देशात यापूर्वीही अनेक आंदोलने आणि उपोषणे झाली असून, चर्चेच्या माध्यमातून त्यावर तोडगा काढण्यात आला आहे. त्यामुळे सरकारने आंदोलकांशी संवाद साधून उपोषण सोडवण्याचा प्रयत्न करावा, अजूनही वेळ गेलेली नाही, असे आवाहनही त्यांनी केले.