अंतरवालीत संघर्षाची ठिणगी! मनोज जरांगे पाटलांच्या गावातच ओबीसी नेते मंगेश ससाणेंचे आमरण उपोषण सुरू; पोलीस बंदोबस्त वाढला

जालना: मराठा आरक्षणाच्या मागणीसाठी आंदोलक मनोज जरांगे पाटील यांचे अंतरवाली सराटी येथे गेल्या नऊ दिवसांपासून आमरण उपोषण सुरू आहे. त्यांची प्रकृती खालावत चालली असतानाच, आता त्याच गावात ओबीसी नेते मंगेश ससाणे यांनी देखील उपोषण सुरू केल्याने जालना जिल्ह्याचे राजकारण चांगलेच तापले आहे. एकाच ठिकाणी दोन विरोधाभासी उपोषणे सुरू झाल्यामुळे परिसरात तणावाचे वातावरण असून, कोणताही अनुचित प्रकार घडू नये यासाठी पोलिसांनी कडेकोट बंदोबस्त तैनात केला आहे.

मनोज जरांगे पाटील यांच्या उपोषणाचा आज नववा दिवस आहे. हैदराबाद गॅझेटच्या आधारे प्रमाणपत्रे वाटप सुरू करावे, या मागणीवर ते अद्यापही ठाम आहेत. तीन दिवसांपूर्वी भाजप आमदार प्रसाद लाड यांनी त्यांची भेट घेऊन उपोषण सोडण्याची विनंती केली होती, मात्र जरांगे यांनी ती फेटाळून लावली. अशातच आता ओबीसी आंदोलक मंगेश ससाणे यांनीही याच गावात लाक्षणिक उपोषण सुरू केल्यामुळे परिस्थिती अधिकच संवेदनशील बनली आहे. "काहीही झाले तरी आम्ही इथून हलणार नाही," असा आक्रमक पवित्रा ससाणे यांनी घेतला असून, या घडामोडींमुळे संपूर्ण राज्याचे लक्ष अंतरवाली सराटीकडे लागले आहे.